春江水暖竟然冇鴨知｜曾智華
更新時間：10:26 2025-10-14 HKT
發佈時間：10:26 2025-10-14 HKT
發佈時間：10:26 2025-10-14 HKT
字體大小
滙豐控股（005）上周提出私有化恒生銀行（011），真是一雷天下響，不但震動銀行界，簡直震動整個香港甚至全球。不過，有一點笑死人，上周四晨咁早公布後，當然人人望住個市點反應，尤其恒生股價會否被炒到上天高？開呀！果然股價爆升，由周三收市119元一嘢爆上到最高168元。我一睇，吓，168元？有冇睇錯？冇！真係168元。喂，究竟邊個咁豬頭，會出呢個價去掃貨，係咪黐咗線？
邊個傻佬168元掃貨？
滙控公布，私有化出價為155元，決不再提高，意即私有化成功，你最多可在155元脫手；但假若私有化唔成功，大鑊，分分鐘撻返去119元或更低。所以，正路是你只應在119元至150元中間買貨，最為安全，一超過150元已是不合理。究竟邊個傻佬出168元掃貨呢？
講返呢單世紀大Deal，真要寫個服字。如此一個「搵大錢」機會，若發生在不少「維威喂」國家，必定會在公布前已有N咁多春江鴨發達。因提早知道此消息，當然會透過親朋戚友、信得過者靜靜雞掃貨。故此通常公布前被收購公司的股價，已唔覺唔覺暗升不少。
但你睇恒生股價，過去一個月幾乎郁都唔郁，只在120元左右移動，上月底更曾低見114.4元，意即冇春江鴨嘗試吸貨。
小股東當然早甩早着
呢單Deal，起碼部署成個月，過程中除滙控及恒生頂層知道，高盛及摩根史丹利作為兩個集團的財務顧問，也一定不少人知。另外，當然有律師團隊及會計師團隊得悉。仲有，就是金管局、證監會及港交所高層。
以上加加埋埋，冇一百都有幾十人啩，但竟然能夠全部堅守機密，不單半點風聲無流出，更完全不見有春江鴨的跡象。
我雖然覺得很出奇，但卻很開心，因這才是一個國際頂級金融中心應有的風範，足以向世人展示香港在這方面的質素及水平。
究竟滙控能否順利私有化恒生？咁樣出手，你係小股東都唔會戀棧一間不知壞帳有幾深的銀行啦，當然早甩早着。
資深傳媒人 曾智華
最Hit
45年屋邨大酒樓結業！曾推懷舊金曲夜 前TVB名廚都有登台 街坊：估唔到成回憶了
2025-10-13 13:32 HKT
93歲胡楓黑面要求記者即場道歉：講聲對唔住 受訪提及已故太太呂詠荷 對方一句話辣㷫修哥
2025-10-13 14:00 HKT
大埔公屋單位入伙僅一年主動交回 街坊：早幾日仲見到個女人返去 原因掀議房署回應揭真相｜Juicy叮
2025-10-12 13:00 HKT
