科技泡沫再度形成｜曾智華
發佈時間：11:45 2025-09-16 HKT
無論樓市或股市，都有一個周期。升時，人人興奮，根本忘記了甚麼是地心吸力，誤會了商品（地產、股市）只升不跌。相反，一跌時，人人則悲觀到以為世界就這樣結束，失去理智及分析能力，只坐困愁城，不斷後悔。
兩個極端情況，股神巴菲特數十年前已指出，當你能夠反其道而行時，正是致富之道。當然，甚麼價位出入及揸沽的Timing，絕對重要。
人是善忘的，也可能從未見過，所以唔知。例如，恒生指數初初面世時，一度由一百點瘋狂地升至千七點。過程中，冇人信恒指會跌，於是買呀買，同時間，古靈精怪股票也博懵上升，例如一隻叫「香港天線」的虛股，變咗「香港黐線」，炒到上天高。
結果，1973年石油危機爆發，股市就似肥皂泡被篤爆，跌到冇人敢信的低，只有百多點。
一面跌時，不少人仍不知股市還繼續向下調整。結果，最死得多人的位置是300至400點 ，其時，不少人買當借去瞓身入市，包括昔日明星股評專家曹仁超，最終屍橫遍野。
之後，香港股市定時就會有一個大浪，例如1997年7月時，人人堅信「明天會更好」，股市升上16000多點。豈料，大家搞錯晒，一過渡，金融風暴殺到，1998年8月，恒指急插至近7000點，只一年，問你死未？
2000年又重上萬七點。記得點解嗎？正是當年出現千禧熱潮，人人以為科網會令全球發大達，於是雞犬股改乜乜科網、物物dot com，已炒到不亦樂乎。再逃不過退潮就知邊個冇着褲，絕大部分股是假大空的，兩下打回原形，停牌或執笠。
好了，正是「橋唔怕舊，最緊要受」。25年後的今天，博大霧一族又再玩包裝了，今次美其名是「科技股」或「科創股」。港交所行政總裁陳翊庭萬分興奮公布有200間公司排隊來港上市，四成是科技企業。老友，我肯定一個「科技泡沫」又再形成中，大家咪傻吓傻吓聽見「科技」兩字就以為與賺錢有等號呀，反之，可能與「騙子」有等號才真！
資深傳媒人 曾智華
