李辰安 - 睇唔睇世界盃？｜辰來之筆
發佈時間：03:00 2022-11-29
以前世界盃決賽周，大家都好似雲遊，唔想返工，返工都無心機，今屆就毫無感覺，反而想睇下台劇。
「安仔，你無賭波，又唔踢波，做人有乜樂趣？」我都費事去中環酒館趁熱鬧，晏畫飲完茶就算，成村人去吹世界盃，容乜易中招？「大師兄，我都係返屋企煲台劇。」銀行偉心水清︰「台劇唔使煲，現實有翻生杉菜大戰京華大少，好睇過大英帝國皇家闔家歡。」估唔到人生比電視劇更加精采，原本係一個兩岸神話，今時今日變咗世紀恩仇錄。好聚好散，何必要在社交平台告狀，唔通又係為咗公義？
張翁好似唔知大家講乜，仲以為講世界盃。「無啦，美斯都算黑仔，睇埋佢老友C朗拿度又點，我諗都唔會有好消息，過咗黃金時代，最好都係順天意，不如坐上觀眾席睇波。」世界盃，依家唔係講踢波，而係講人權，西方媒體日日狙擊主辦國人權現況，同埋過去嘅施工傷亡數字，搞乜呀，我聽到都無心機睇世界盃。
「今晚唔去搵碧咸仔飲杯大啤酒？」免啦，我又唔係標準球迷，我最投入之世界盃，就係碧咸初出道，大哨、細哨雙輝影之美好年代，依家有乜好講，你問我中東人權狀況如何，我點識得答。「返去睇下《流星花園》咪幾好，原來台劇係咁引人入勝。」
「安仔，唔好講咁多無謂嘢，不如快快手手叫個臘味煲仔飯，加個豆腐海鮮湯，食咗好暖胃。」是但啦，最緊要有壺普洱，消下油膩。「杉菜確係命硬，人生充滿戰鬥力，你咪以為寶島姑娘好相遇，你有乜依郁，揸定碌竹。」命硬也者，表示做人好有原則，不可以吞下半口冤氣，是是非非好清楚，去到天腳底都要尋找公義。
老闆又行過嚟，以為我哋一定係講世界盃，點知講緊杉菜，佢一頭霧水，唔知前文後理，不過，佢都知杉菜係邊個。「長髮姑娘呀，十幾二十年前好紅，紅到唔睇都講過，因為港劇只有港女角色，港女平面好多，邊夠杉菜咁有層次同深度。」老闆，真版杉菜更加精采，如果發生在香港，大台嗰個電視包青天節目就好唔得閒，搵兩家家長上台現場對質，我恐怕收視破紀錄。
「我就話不如搵兩家人組隊玩獎門人仲有睇頭，大家有競爭有鬥爭，一起吹波波，食日本芥辣，然後一齊碌地沙，點睇？我話收視率呀。」吹水吹到電視台革命，真係無嘥咗老闆壺陳年普洱，咁都畀你銀行偉諗到，曾總不如搵你上去幫手啦。
「其實名男名女好難和諧，我食到幾十歲，見到好多冤家都係雙方好叻，不過正正唔係得正，總係正正得負。」是以有錢人教仔教孫，千祈唔好搵個風頭躉或者女強人返屋企。「點解呢？因為太有個性累死人，如果你係無乜所謂之好女子，好多時反而會變成喜劇收場。」話說張翁有個富二代朋友，娶咗一個以為好幫得手之高學歷女子，斷估有好日子過，點知呢個好有能力之賢內助，係管理狂魔，乜都歸佢管，老爺奶奶都當佢無到。「因為呢位巴閉女可以唔使恨夫家之身家，人哋係美資大行高層，佢仲嫌老公屋企生意之不過中小企家族生意，所以係人都無面畀。」結果當然係分開收場，但係雖不至好似杉菜咁走極端，但係打官司打到成個中環都知，富二代朋友捱咗幾年，終於精神衰弱，成個人收埋收埋，好在佢個女秘書，離咗婚嘅，好好人，擺咗成副心機去幫富二代，唔介意名分，乜都無所謂，「結果富二代走出人生陰霾，變成花花公子。」
咦，又會有大龍鳳？「唔會，女秘書一笑置之，富二代亦識得有分寸，總之開開心心，大家心領神會，於是乎，相安無事。」嘩，張翁，你好似講城市童話，咁有幻想力，你不如去搵曾總開拍呢個故事，一定收得。」臘味煲仔飯有啲熱氣，留低底飯焦，用海鮮湯浸一浸，咁就Very Good啦。
「安仔，今晚唔去吹水睇世界盃？真係返去睇台劇。」係囉，世界盃唔啱我乜滯，我識得嘅好波之人都已經一把年紀，後生嗰班我又唔多熟，不如休息下先。「世侄，去睇波啦，屋企邊有氣氛。」好啦好啦，等陣去中環酒館見啦，飲完幾杯，會好瞓啲。
