李辰安 - 王百萬的懷舊故事｜辰來之筆
發佈時間：03:00 2022-05-03 HKT
香港每十三個人當中有一位家財千萬，你覺得驚訝嗎？當然不會，市區住宅單位新盤有邊度唔使千萬元？
是日好多人飲茶，天氣炎熱在門口等位確係考驗，好在話咁快就有位，於是同張翁首先坐低，佢話︰「如果計手頭上揸現金一千萬，又或者供完樓先至算入個人資產，香港係咪仲有咁多千萬富翁呢？」我心諗，只知你就肯定家財千萬，仲係買股票分分鐘上落幾十萬嗰款。
「係嘞，世侄知唔知上世紀六十年代，王百萬係富豪代名詞，你唔一定姓王，但總之就叫做王百萬。」明白，廣東花名不外乎，賣豬肉就叫阿榮，賣魚就係阿勝，幾十年前有錢人多數姓王，係咪。大師兄剛剛趕到，馬上加入話題︰「當年四、五萬一層樓，而且無得分期付款，王百萬就真係富豪啦，一百萬可以有二十層樓，以目前市值一千萬一層計，王百萬即係今日身家兩個億，豈止千萬咁簡單。」
銀行偉聽見錢就特別醒神，佢話今時今日有兩億都OK，不過，係投資界眼中屬於唔湯唔水。「偉哥，貧窮令我無法有想像，兩億身家唔通係細客仔？」銀行偉無答我，張翁就好了解箇中問題︰「世侄，如果你得嗰兩個億，想做生意，除非係開網店，就算做茶餐廳都好吃力，裝修去你一千個，租金、夥計又一大筆跟尾，遇到第五波疫情，停你兩至三個月，你已經差唔多要投降。」
嘩，茶樓老闆咪好有實力，你咪以為佢係街坊一名，分分鐘幾億身家。我問老闆係唔係？佢話茶樓十幾年前做落，有幾個股東合資，其實自己都係當打份工，邊有幾個億？發夢就有。「我都幾想退休唔做，呢個疫情搞到我陀陀擰，幾乎長期失眠咁話。好在有你哋呢班老友記，你哋係我精神支柱。」老闆真係識講說話，你話大家點好意思唔勤啲落嚟幫襯。
張翁同大家懷舊，佢講開香港和平之後，好多後生仔因為戰時夠膽博，所以搵到下錢，有位知名人物，大家都識，不過無謂開名嘞，佢二十幾三十歲就有過百萬，點好呢？提早唔使做環遊世界，似乎又早得滯，有錢又點，最緊要趁機再建立一番事業。不過，戰後經濟唔係好穩定，唔多搵到錢嘅，走去炒金、炒水貨，結果輸清光，一百幾十萬想發圍做大生意，你又無當時洋人集團之實力，呢位百萬年輕人忽然感到有點煩惱。
大家聽到入晒神，老闆親自上菜，一碟用心之作，就係懷舊之蝦子柚皮，清清地，好啱時令。「張翁，你有冇過百萬身家之煩惱？」張翁話後生都係幫屋企打工，好少諗到自己會有幾錢身家，亦無想過出嚟自立門戶，所以無煩惱，最多都係伯爺成日督促佢，做到無時停手。
講番嗰位百萬年輕人，一次因緣巧合，找到過隔離埠發展之機會。「係好筍㗎，簡直係大茶飯，不過，食得大茶飯就代表你會觸犯了一班既得利益者，你知隔離埠唔係人咁品，於是要睇下呢位年輕人點諗。」張翁隨手做個民調，在座三位邊個敢接受挑戰？結果一個都無。我同大家解釋︰「當年有一百萬，我會買層太子道千呎單位，唔好結婚住，得閒開架跑車過海上山頂遊車河。」大師兄就話︰「食大茶飯好凶險，成功機會最多亦係一半一半，博得過咩？多一事不如少一事，我都學安仔咁，吃喝玩樂就算。」
銀行偉就好特別，佢話呢一個係好好之故事題材，不如由我開筆寫個《港澳風雲錄》。「偉哥，你係咪要加插穿越時空嗰隻故仔。」當然啦，潮流興呀，你忽然從上世紀五十、六十年代之隔離埠，回到未來之香港，再搵昔日之女朋友，又順便解開當年一件未解之懸案，你話劇情幾豐富。
「世侄，重點係隔離埠食大茶飯已經好多故事畀你發揮，又驚險，又可以加入浪漫橋段，想像一下係俊男美女，又有占士邦之飛車追蹤場面，掂呀！」張翁講到如此興奮，我就唔會掃佢興，一於話好好好，食完先至講。其實，後生仔應該有上進心，唔好以為有千萬身家就滿足，當然，食大茶飯在現實生活好少出現，大家當故事聽下算數。我相信今次疫情過後將會有好多商機。「安仔，你真係要老套啲講句，祝願世界和平至得嘞。」好，大家咁話！
