李辰安 - 王百万的怀旧故事｜辰来之笔
发布时间：03:00 2022-05-03 HKT
香港每十三个人当中有一位家财千万，你觉得惊讶吗？当然不会，市区住宅单位新盘有边度唔使千万元？
是日好多人饮茶，天气炎热在门口等位确系考验，好在话咁快就有位，于是同张翁首先坐低，佢话︰「如果计手头上揸现金一千万，又或者供完楼先至算入个人资产，香港系咪仲有咁多千万富翁呢？」我心谂，只知你就肯定家财千万，仲系买股票分分钟上落几十万𠮶款。
「系嘞，世侄知唔知上世纪六十年代，王百万系富豪代名词，你唔一定姓王，但总之就叫做王百万。」明白，广东花名不外乎，卖猪肉就叫阿荣，卖鱼就系阿胜，几十年前有钱人多数姓王，系咪。大师兄刚刚赶到，马上加入话题︰「当年四、五万一层楼，而且无得分期付款，王百万就真系富豪啦，一百万可以有二十层楼，以目前市值一千万一层计，王百万即系今日身家两个亿，岂止千万咁简单。」
银行伟听见钱就特别醒神，佢话今时今日有两亿都OK，不过，系投资界眼中属于唔汤唔水。「伟哥，贫穷令我无法有想像，两亿身家唔通系细客仔？」银行伟无答我，张翁就好了解个中问题︰「世侄，如果你得𠮶两个亿，想做生意，除非系开网店，就算做茶餐厅都好吃力，装修去你一千个，租金、伙计又一大笔跟尾，遇到第五波疫情，停你两至三个月，你已经差唔多要投降。」
哗，茶楼老板咪好有实力，你咪以为佢系街坊一名，分分钟几亿身家。我问老板系唔系？佢话茶楼十几年前做落，有几个股东合资，其实自己都系当打份工，边有几个亿？发梦就有。「我都几想退休唔做，呢个疫情搞到我陀陀拧，几乎长期失眠咁话。好在有你哋呢班老友记，你哋系我精神支柱。」老板真系识讲说话，你话大家点好意思唔勤啲落嚟帮衬。
张翁同大家怀旧，佢讲开香港和平之后，好多后生仔因为战时够胆博，所以揾到下钱，有位知名人物，大家都识，不过无谓开名嘞，佢二十几三十岁就有过百万，点好呢？提早唔使做环游世界，似乎又早得滞，有钱又点，最紧要趁机再建立一番事业。不过，战后经济唔系好稳定，唔多揾到钱嘅，走去炒金、炒水货，结果输清光，一百几十万想发围做大生意，你又无当时洋人集团之实力，呢位百万年轻人忽然感到有点烦恼。
大家听到入晒神，老板亲自上菜，一碟用心之作，就系怀旧之虾子柚皮，清清地，好啱时令。「张翁，你有冇过百万身家之烦恼？」张翁话后生都系帮屋企打工，好少谂到自己会有几钱身家，亦无想过出嚟自立门户，所以无烦恼，最多都系伯爷成日督促佢，做到无时停手。
讲番𠮶位百万年轻人，一次因缘巧合，找到过隔离埠发展之机会。「系好笋㗎，简直系大茶饭，不过，食得大茶饭就代表你会触犯了一班既得利益者，你知隔离埠唔系人咁品，于是要睇下呢位年轻人点谂。」张翁随手做个民调，在座三位边个敢接受挑战？结果一个都无。我同大家解释︰「当年有一百万，我会买层太子道千呎单位，唔好结婚住，得闲开架跑车过海上山顶游车河。」大师兄就话︰「食大茶饭好凶险，成功机会最多亦系一半一半，博得过咩？多一事不如少一事，我都学安仔咁，吃喝玩乐就算。」
银行伟就好特别，佢话呢一个系好好之故事题材，不如由我开笔写个《港澳风云录》。「伟哥，你系咪要加插穿越时空𠮶只故仔。」当然啦，潮流兴呀，你忽然从上世纪五十、六十年代之隔离埠，回到未来之香港，再揾昔日之女朋友，又顺便解开当年一件未解之悬案，你话剧情几丰富。
「世侄，重点系隔离埠食大茶饭已经好多故事畀你发挥，又惊险，又可以加入浪漫桥段，想像一下系俊男美女，又有占士邦之飞车追踪场面，掂呀！」张翁讲到如此兴奋，我就唔会扫佢兴，一于话好好好，食完先至讲。其实，后生仔应该有上进心，唔好以为有千万身家就满足，当然，食大茶饭在现实生活好少出现，大家当故事听下算数。我相信今次疫情过后将会有好多商机。「安仔，你真系要老套啲讲句，祝愿世界和平至得嘞。」好，大家咁话！
