白飯魚精神——辰來之筆

　　（作者李辰安，從事創作二十年，開拓城市感覺派文風，與讀者一起懷舊，穿越香港時空找尋生活新旨情。）
　　小時候，家中有一個很標致的月份牌，幾個小孩湊在一起寫書法，六個大字︰愛祖國，用國貨。
　　「安仔，你講嗰個一定係上世紀六十年代，最高指示話要中國優先，當年國貨最威水係『兩彈一星』，唔係你嗰啲小兒科。」甚麼「兩彈一星」呀？大佬！我喺度懷念小學時代打籃球穿過的回力球鞋。說起來，我讀小學就好愛國，不過，升中之後我馬上換了一對Converse，好快就是彪馬、阿迪達斯，後來想愛國都有困難，因為市面上已經好難買得到回力鞋，同學仔話︰「你去上水搵下，鄉下地方可能有國產球鞋賣。」說着說着，早排我去深圳行商場，都找不到回力蹤影，後來又有人叫我上網搵淘寶，一時之間搞到我好焦慮。
　　點解要搵番對回力球鞋嚟着呢？其實最緊要係潮流興復古，品牌有故事，回力合乎以上所有條件，這陣子好紅。大師兄今日出席我們的黃昏酒敘，佢問番我轉頭︰「你穿過邊款回力鞋？」當然係回力565，即係鞋內底邊有個半月紅印嗰款高筒籃球鞋，有白色，有藍色，我現在跪求一對藍色回力565，襯我條李維氏501牛仔褲，你知無？
　　「你應該記得啦，上世紀八十年代，中國女排第一次贏奧運會金牌，成隊都係着回力球鞋，你話係咪好有故事性呢？」不過，大師兄聽完之後，用好奇怪之眼光望着我。張翁在旁似有所領會，替我補充一句︰「當年中國女排唔着回力，唔通着人字拖出場咩，佢哋邊有外匯學你師弟咁，買阿迪達斯？」
　　我唔知國家隊幾十年前之財政狀況，之不過，着國產球鞋可以打贏上世紀六十年代創下連續一百一十八場國際賽不敗紀錄、有「東洋魔女」之稱的日本隊奪冠，同時又打破我童年《青春火花》之偶像崇拜，的確有料到。
　　大師兄又問︰「安仔，郎平當年係着回力排球鞋，唔係回力565，同你有何關係，況且仲係女裝？」大師兄，唔該唔好去到咁盡咁僵化啦，就係因為有了女排着回力之勵志故事發生，於是這個品牌便添上一份附加價值，並且可以成為塑造潮流與回憶的題材。「唔係噃，中國男籃着回力捧世界盃就話值得捧場啫！」大師兄，你好似想話我搵藉口愛祖國咁噃，你有無想多咗？
　　「其實成件事係咁嘅，兩位鄉下師兄，你哋有所不知，回力球鞋之忽然興起，同中國女排，同愛祖國都關係不大。」望下呢位好少用國貨之美籍香港人銀行偉，佢好似對回力好有認識。「回力近年因為有荷里活明星高調地着過，特登畀人影到仲Post上網，於是引發品牌效應，內地大小名人、明星、網紅紛紛着對回力示人，如是者，連辰哥都要追趕這股回力風。」
　　有道理，大師兄唔該唔好諗埋一邊，回力全靠「外國勢力」再崛起，並非愛祖國情懷使然，請你唔好戴有色鏡眼對待回力迷，OK！再者，你唔覺得回力球鞋真係有一種「回力精神」咩？好似當年我哋全班人人着西德波鞋、美國帆布鞋，硬係我哋嗰位中文中史老師，係都着大地牌恤衫、灰色西褲，加對回力球鞋，完全表達得出佢對時代之態度，真係好鬼有型。當年自己膚淺唔識得欣賞阿Sir之風格，今日想起來覺得慚愧。
　　係噃，德高望重之張翁，你後生打網球着乜品牌之球鞋？「我喺英國買番嚟之白色帆布球鞋，後來我個Club從英國直接訂貨，大家都係着嗰款，Uniform吖嘛。」嘩，真係充滿英國色彩，非常懷舊，以上係上世紀五十、六十年代上流華人社會之Style，真係無得恨，又無得學。
　　想當年，我着彪馬係因為佢代表南美運動勢力，初中我有一對經典之Brasil Puma，綠底黃間，鞋身有個「Pelé Brasil」之壓紋。「咦，即係紀念球王比利，珍藏版，依家有無留低？」偉哥，我讀中學買嘅，你話幾多年前之事？着過，跑過，擁有過就是緣份，不必多求。「安仔，咁佛系思想，咁不如唔好着名牌啦，白飯魚唔係幾好咩？」大師兄，大家都着過「白飯魚」，此乃香港上一代幼稚園、小學之集體回憶，亦係代表香港獅子山精神之歷史文物。
　　「安仔，你飲多咗？唔該你解釋一下，大家唔明。」當年，國產金錢牌出品之白面綠底、人稱「白飯魚」之帆布鞋，原本是網球鞋，此時但見張翁眼眉一跳，好似好難相信，佢話︰「我以為白飯魚專為白事而設，我幾十歲未見過人着對白飯魚打網球。」張翁，你喺英式俱樂部出入，又點知當年獅子山下，除了幼稚園、小學生穿白飯魚返學上體育堂之外，香港體力勞動人士，好多都係着白飯魚開工，嗰陣時香港主要係工人世界，大家只望有瓦遮頭，有對白飯魚着返工之獅子山歲月。白飯魚既係淳樸之代表，又係奮鬥之標誌，之不過，上世紀七十年代之後，香港富起來，人人可以做中產，適值外國運動鞋文化興起，於是大家放棄了白飯魚，但係大家唔好忘記香港曾經有過「白飯魚精神」。
　　「喂，唔該你唔好咁精神氾濫，一時回力精神，一時白飯魚精神，你知唔知自己噏緊乜？」大師兄，唔好咁燥底，「We are白飯魚boys」係一種時代身分，代表我哋着住對膠鞋腳踏實地，面對時代逆境之堅毅精神。
　　張翁有點不以為然︰「安仔，你都好牽強啫，我無着過金錢牌白飯魚，唔通我無精神？唔通獅子山無我分呀？」張翁，你言重了，你真係唔係白飯魚子弟，但係大家同在獅子山下，一起奮鬥，咪以為我哋有優越感，大家唔好講咁多，不如飲番杯。
　　「係嘞，我唔得閒同你講，內地周街都有回力鞋專門店，想買對回力鞋有幾難，係你唔知碇之嘛。」係，我唔知碇，多謝賜教，敬你一杯！