專欄蘇蝦仔｜紅魔睇數據用奇兵

更新時間：12:00 2025-11-01 HKT
發佈時間：12:00 2025-11-01 HKT

麥比奧莫梅開二度，馬菲奧斯根夏攻入開齋球，曼聯憑兩位新援的精采表現，剛輪英超主場4:2擊敗剋星白禮頓，取得久違了的聯賽3連勝。隨住2人越踢越好，證明紅魔今夏不求理念，只睇數據的引援策略成功了﹗

xG數值點將放棄假大空

近年球壇特別著重xG，即預期入球值，用來衡量每次射門的質量和入球機率，如果實際入球比xG高，代表該球員可以將並非良好的入球機會轉化成入球，亦可以說經常可以帶來神來之筆。去季英超攻入10球或以上，而實際入球數字比xG高出最多的2位球員，分別是xG為8.6球，最後攻入15球的根夏，以及xG為12.3球，取得20球的麥比奧莫。　　
兩人擅於化腐朽為神奇，將唔係入球機會的射門轉化成士哥，曼聯就係相中他們這個特點，在轉會市場初期先後簽下。如今2人在一左一右獨力闖關，靠個人能力推高曼聯xG、推高總入球數字，相信如果球隊並非有2人在陣，繼續用阿歷真度加拿祖等的鋒將，應該只會排下半版。　　
曼聯過去幾年空談理念，要買自帶流量的鋒將，要用踢法好睇的球員，想踢進攻足球，結果弄巧反拙。魯賓艾摩廉和班主拉克特利夫決定放棄假大空，與其絞盡腦汁去建立進攻套路，不如直接跟數據行事，搵兩位上季英超最擅長「夾硬」製造入球的球員加盟，去到第9輪已見到成效。蘇偉業

↓立即下載星島頭條App↓