專欄蘇蝦仔｜曼聯規劃不周陷轉會困局

更新時間：12:00 2025-07-12 HKT
發佈時間：12:00 2025-07-12 HKT

利物浦賣後備中堅昆沙，都賣到3000萬鎊；曼城放棄從未為球隊上陣的年輕右閘恩古圖，進帳2000萬歐羅；諾定咸森林的曼聯棄將艾蘭加，接近以5500萬鎊投紐卡素。而紅魔呢？唔好意思，除掛靴的莊尼伊雲斯，以及約滿的基斯甸艾歷臣和域陀連迪路夫外，一個都賣唔走。
究竟係球會問題？定係球員問題呢？當然兩者都有。以鋒線4傑為例，拉舒福特衰眼角高，非巴塞隆拿不嫁，近日願意揀多一支球隊，就是德甲班霸拜仁慕尼黑，但兩支豪門級球會又點會輕易看上他，只視他為鋒線替補人選，交易有排都未成事。而加拿祖就將自己與領隊魯賓艾摩廉的矛盾放上水面，球圈都知道紅魔想放走他，可是其表現和實力未足以令潛在買家滿足曼聯的6000萬鎊報價，要減價先有球隊肯接手。
4翼鋒一個都賣唔走
查頓辛祖同樣態度出事，車路士寧願賠錢都唔買斷說明一切，其名聲在英國球壇難有立足之地，惟有外闖，但潛在買家不多。安東尼就與態度無關，貝迪斯有十足誠意斟介，只是後者財政困難俾唔起4000萬鎊，三方仲搵緊方法解決。
以上的問題，都唔夠曼聯責任大。紅魔本身規劃出事，4人都係翼鋒，2左2右，正常怎會在同一位置囤這麼多人，不合用就一早放走，而不是買完無效果再買。而且歐洲頂級豪門最不缺乏就是翼鋒，隊隊都儲備充足，又怎會幫紅魔接收棄將，中小型班球隊就無財力去承擔，曼聯就陷入轉會困局。蘇偉業

↓立即下載星島頭條App↓