港人要求茶樓侍應「班地厘」拎刀叉被無視網上公審「家吓冇人用？」遭網民反嗆：扮內行變奈何

更新時間：15:39 2026-09-22 HKT
發佈時間：15:39 2026-09-22 HKT

不少港人都喜歡到茶樓品嘗點心歎「一盅兩件」。近日，有港人到一間連鎖酒樓用餐時，為了幫缺牙的長輩切碎食物，遂向侍應索取刀叉，期間多次示意他們去「班地厘」取餐具，惟對方毫無反應，形容「成碌木咁企係度」。事主其後在網上發文公審，指控「家吓酒樓冇人知『班地厘』呢個名咩？唔用咩？」惟圍爐失敗，反遭網民直斥：「正正經經講唔得嘅咩？一定要扮內行變奈何」，即看下文了解詳情。

港人要求拎刀叉被無視網上公審茶樓侍應：家吓冇人用「班地厘」？

近日，有網民在Facebook群組「香港酒樓關注組」發文，指早前帶同缺牙的長者到連鎖酒樓用餐，為方便長者進食，於是向侍應要求拿一套刀叉，惟對方「去咗好耐都未見有」。事主於是再叫住另一名掛著對講機的侍應，並指示對方：「你去『班地厘』攞啦」、「『班地厘』有㗎啦，你去就有。」惟對方一臉茫然，只堅持酒樓沒有刀叉，整個人「一碌木咁企喺度」，讓事主質疑「你唔想行定唔知『班地厘』係乜……」

不久後，第一位侍應終於拿來一套刀叉，事主更藉機「串」該名侍應：「呢支唔係叉。」其後更在網上發文公審，怒斥「家吓酒樓冇人知『班地厘』呢個名咩？唔用咩？」

圍爐失敗遭網民反嗆：正正經經講唔得咩

帖文引起網民熱議，有人解釋「班地厘」是中式餐飲業的傳統術語，指的是傳菜部，惟並非所有新入行員工都知道，「正正經經講唔得嘅咩，一定要扮內行變咗奈何」、「Pantry『班地厘』行內語，新仔唔係個個識，你串人人串你，唔係鉸剪都唔識帶呀？」、「今時今日唔喺好多人唔明你講嘅叫『班地厘』喺乜嘢，只有以前做過飲食行業先明你講乜，你叫佢去傳菜部攞較剪就攪掂啦！」

有網民則斥責事主準備不足，建議與長者外出食飯應自備食物剪刀，「照顧老人家者，一般會自備小廚剪，衛生清潔」、「不孝子！稍為有知覺都會自帶較剪，埋單幾錢咁大把」、「係我做侍應都聽唔明啦，講埋晒啲咁嘅嘢！明知老人家食唔到嘢就自己帶鉸剪，麻煩啲侍應鬼得閒招呼你呀！」

事實上，「班地厘」是廣東中餐酒樓的行內用語，由英文「Pantry」音譯而來，「Pan 」讀作「班」，「Try 」讀作「地厘」，後來演變成對廚房與樓面之間傳菜崗位的稱呼。在舊式大型茶樓中，「班地厘」是負責把菜式由出菜口分流、傳送給樓面侍應的崗位。

圖片及資料來源：Facebook@香港酒樓關注組

文：Y