$116牛肉飯被指呃秤？港男上磅即「斷正」 無論叫幾多都得50g 店方咁回應
發佈時間：18:22 2025-05-12 HKT
不少健身愛好者，都會嚴格控制熱量攝取，部份在外用餐更會帶備電子磅，務求精準控制食量。不過，這個小習慣今次卻意外揭發餐廳疑似呃秤行為。有網民今日在社交平台發帖，指銅鑼灣一家牛丼專門店提供的牛肉份量遠低於菜單標示，下單120克牛肉，當場上磅磅重僅50克，差距甚遠，事件在網上引發熱議。
牛肉飯疑呃秤 港男即場上磅踢爆 無論叫90g定120g都得50g!?
今日(12日)，有網民在社交平台分享其在一牛丼專門店的用餐經歷，稱點選標示含120克牛肉的餐點，發現份量明顯不足。由於事主有健身與控制飲食的習慣，便拿出隨身的迷你電子磅秤重，他描述：「一眼睇落去就知90g都無，上磅仲離譜」，發現實際秤重僅50克。而事主女友，下單的90克牛肉餐，同樣僅得50克。事主質疑餐廳的份量標準，稱：「定其實standard係50g？你地廚房連個磅都無，點統一出餐重量？」他表示，若非自備磅秤，恐連補加份量的機會也沒有，並計劃向監管部門舉報，以警示其他消費者。
此帖文迅速引發關注，有網民就分享在同一餐廳遇到類似經歷，部分更建議向海關舉報，懷疑餐廳違反《商品說明條例》。一名網民留言：「呢間啲嘢係幾好食，食過幾次都勁呃秤，但係又冇諗過要帶個磅影低佢嘅罪證，違反商品說明條例㗎。」另外，有網民推測餐廳餐單的標示，可能以生肉重量計算，稱：「佢一定係計before cook， sous vide完會有水份流失。」、「其他同8安士牛扒一樣，係煮之前8安士，全世界都係咁」。
餐單標示為熟成前生肉重 店方承諾改善
針對事件，店家公開回應，解釋標示的90克或120克為「熟成前生肉重量」，並承認菜單表述易生誤解，稱：「明白到我哋寫90g/120g的確係會令客人認知係出品90g重量（可能新啲嘅同事都未認知清楚）。」店家表示將立即更新菜單，並明確標示重量為「Raw（生肉）嘅階段」，又就事件致歉，承諾加強員工培訓，感謝網民的「善意意見」。
網民未收貨 指店家說法取巧
惟事主與網民均未能接受餐廳提出的說法，認為無法解釋重量差距之大，事主直言回應並不合理「你地口口聲聲話有$88有90g肉食，但係到我入口個下變左50g？咁我食個下係咪要腦補埋蒸發咗個啲水分」，亦有網民引述資料指，即使牛肉經烹煮後，重量流失也大概2成左右，即至少有70克。也有人指餐廳說法取巧「你又唔敢寫$88得50g，又要扮多，賺唔夠咪出聲囉」、「你啲員工又會話睇錯、要加返畀客人嘅？你而家搬龍門呀？」、「但冇解釋到，同時間order一份120g及一份90g，出到黎兩份都係50g，存在欺騙成份 」，似乎未能令網民收貨。
資料、圖片來源：tszyuen__kelvin＠Threads
