【#拉麵控必食】食完無罪惡感！識食當然食口感濃厚、味道卻不失清淡的雞白湯湯底

更新時間：12:00 2020-06-10 HKT
發佈時間：12:00 2020-06-10 HKT

對於女士而言，拉麵澱粉質含量高、湯底濃、叉燒又肥，食一碗，分分鐘要做返成個星期運動先減得返，所以不少拉麵控因為呢份罪惡感，令拉麵本身就有唔少人會卻步！不過，只要識食，拉麵控都可以照食可也～因為拉麵其實都有分唔同湯底，鍾意重口味可以揀豬骨湯、味噌湯或者魚介湯，口味清淡可以選擇雞湯、鹽湯同醬油湯。想食完無罪惡感，就一定係揀下面呢款雞白湯喇！

雞白湯拉麵一向畀人嘅印象係較為清淡，相比起其他湯底，雞湯就非常符合想食濃湯拉麵但又怕肥膩有罪惡感嘅人。身為拉麵控嘅小編，食過唔少香港拉麵店，一講起雞湯拉麵就會第一時間聯想起灣仔嘅鳥華亭！

以而家香港拉麵店嘅競爭環境，一間普通拉麵店如果無自家特色，就只會淪為街邊劣食，即使比多幾蚊都唔值。鳥華亭主打雞白湯拉麵，但筆者從來未食過一間雞白湯拉麵嘅雞湯係可以咁「膠」，飲落好似將幾隻雞嘅膠質濃縮喺一碗湯入面，感覺就好似將潮州肉凍溶解成湯汁再煮稠，那份滿足口感好似係口入面爆炸出來。

相比起其他拉麵店，鳥華亭有一種日本空手道武術家嘅感覺，最普通最直接嘅直拳、踢腳，無需任何花巧動作，但簡單一個動作已經足以擊倒對手，無需要喺叉燒或者配料上花多餘氣力。雖然雞白湯屬於較為清淡嘅湯底，但佢將雞白湯煮得比豬骨、魚介湯底加倍濃厚嘅口感，而最最重要係濃厚之餘又不失雞湯原本嘅清淡，喺湯底面前，其他配料都不太值得一提。

因為好簡單一個道理，無論叉燒煮得有幾淋，燒得有幾香，一碗拉麵最重要嘅，永遠就只有一樣嘢，就係湯底。一碗拉麵好唔好食，有無味道，都係因為湯底。

人類有無靈魂，大哲學家蘇格拉底或者柏拉圖都唔能夠解答，但如果問拉麵有無靈魂，好肯定呢碗拉麵嘅靈魂就係佢個雞白湯湯底度。

Text：Jack

Photo source: 鳥華亭Facebook