黃浩然大爆力抗TVB狂蜂浪蝶 絕情對待女星:半夜做咩要打嚟 結婚21年零緋聞保億萬愛妻

更新時間:09:00 2026-11-18 HKT
發佈時間:09:00 2026-11-18 HKT

黃浩然近日接受周國豐YouTube節目《國豐百科》訪問,暢談結婚21年來的保鮮秘訣,以及昔日大病一場的生死啟發。黃浩然是圈中出名「愛妻號」,與太太莫家嘉於2001年拍攝電影《新紮師妹》時結緣,當時莫家嘉在戲中任職電影形象指導,兩人一拍即合並於2005年拉埋天窗。黃浩然太太背景相當顯赫,她是億萬身家馬主莫英儒的千金,雖然黃浩然婚後榮升「億萬駙馬爺」,但他多年來依然堅持自食其力,在幕前拼搏賺錢養家。

黃浩然拒同女星交換電話

身處充滿誘惑的娛樂圈,黃浩然與太太結婚21年依然恩愛如昔,當被周國豐問到20多年來婚姻關係有否試過出現危機,黃浩然即自豪地說:「咁touchwood就係冇嘅!好多人話:『你冇緋聞喎,點會冇緋聞呀,冇可能㗎嘛。』」能夠做到「零緋聞絕緣體」,全靠黃浩然極強的自制能力及刻意避嫌,他在訪問中大爆入TVB頭五、六年,從不與女演員交換聯絡方式:「講真我嗰時,喺電視台裡面頭嗰五六年,係冇女性演員有我電話嘅,我唔畀㗎!交換都冇,係好friend嗰啲去到後期我先至會交換電話。」問到狠心斷絕來往的原因,他直言是為了杜絕一切誤會:「好驚嗰啲,半夜兩點send個WhatsApp畀你。你就算冇嘢你都大鑊啦,唔好搞呢啲矛盾啦,我會係咁囉。其實佢半夜搵得我,一係就真係半夜收工想搵人傾吓,一係就真係對我有嘢,唔好搞咁多啦」。除了不交換電話號碼,黃浩然工作以外也絕對不與女星私下約會,他非常堅定地表示:「我都好少完咗工作再約出嚟嘅女性朋友,我好深信係:冇嘢做咩約佢出嚟啫?瞓都冇得瞓,唔好搞咁多嘢啦」 。

相關閱讀:「億萬駙馬」黃浩然打卡變熱話?三父子生活貼地乘東鐵 網民識破車廂內不尋常設備

黃浩然富貴妻原是不婚主義者

黃浩然太太家底豐厚,但原來思想相當前衛,最初更是「不婚主義者」。黃浩然笑言:「其實我老婆係話唔使結婚嘅!喺我哋拍拖嘅時候,佢話其實拍拖咪得囉。但係佢知道我諗住、想有小朋友,同埋亦都要同屋企人交代,佢嘅父母,咁咪結婚囉。」他亦深情補充指:「如果我係諗住古靈精怪、玩玩下,咁做咩要結婚、做咩要束縛呢?既然大家都係有共識想生小朋友,就一定要用努力去維持啦。」

黃浩然曾患罕見病停工9個月

雖然貴為「億萬駙馬」,但黃浩然拍劇從不錫身。直至2014年,他因長期工作過勞,突然患上罕見免疫系統疾病「貝賽特氏症」,當時出現喉嚨潰瘍、皮膚病變及視力模糊等嚴重症狀,被迫停工休養長達9個月。重提十多年前這場大病,黃浩然坦言是一大人生啟發:「『貝賽特氏症』是一個免疫系統嘅病,都係話冇原因,話我『攰啦,要休息啦』,其實有啲似我哋呢行好多人有嘅紅斑狼瘡。嗰時我都話:『我冇乜壓力呀,好OK呀!』但係其實個身體話畀你知:『喂你唔得啦,你個炸彈爆啦!』」他更以汽車比喻身體:「亦都慶幸我三十幾歲未到四十歲有呢個病,我早啲知。即係你部車,我唔會揸咗三十萬公里先至跪低,你揸咗十幾萬公里就跪,你都仲有得整。同埋康復過程快啲嘛,你年紀太大搞唔掂。」休養的9個月令他學會放慢腳步,在工作、家庭與健康之間取得平衡,痊癒後他更加愛錫身體,現時更經常帶着兩個兒子一起跑步,強身健體。

相關閱讀:49歲前TVB一線小生自爆患罕見病  喉嚨潰瘍皮膚病變視力模糊  辭演劇集即晚「被取代」