朱咪咪榮升嫲嫲拒幫手湊孫：我負責玩 長居新加坡豪宅自爆做阿四 曾長年分隔惹兒子怨恨
發佈時間：10:00 2026-11-04 HKT
有「鬼馬歌后」之稱的朱咪咪早年為養家常年獨留香港登台拍戲，丈夫與兩名兒子則定居新加坡。由於相隔兩地，她有時半年才能探親一次，令二仔馬健晉童年時因缺乏陪伴而感到不解；近年她逐漸放慢工作步伐回歸家庭，大部分時間留在新加坡與大仔馬健庭一家同住。隨着大仔於2017年成家立室，她如今亦已榮升嫲嫲，不過性格幽默豁達的她笑言不會幫手湊孫，直言：「孫女出世梗係佢老竇老母自己湊返，而家唔好玩，我係負責玩。」
朱咪咪居星洲豪宅親自打掃
朱咪咪現時長居新加坡，最初與兩子及新抱同住其兩層半住宅，細仔婚後則搬到附近居住。雖然榮升嫲嫲，但她平日「坐唔停」，除了每日去街市買餸、煲湯及煲涼茶，家務更親力親為：「我係負責清潔，屋企兩層半，我冇請過工人，我就係嗰個工人，辛唔辛苦係你自己諗，抺地掃地啫，咪當做運動。」從她過往曝光的家居可見，大宅樓底極高且格局方正實用，裝修走傳統溫馨路線；門前的大花園更栽種了兩棵茂密松柏，朱咪咪亦曾在此為愛犬沖涼，環境寬敞舒適。
相關閱讀：朱咪咪現身親揭暴瘦原因：年紀大越肥越危險 香港物業全放租 安心做包租婆長居新加坡
朱咪咪：血糖高咗少少，問題不大
談及近況與健康，朱咪咪笑稱自己從不刻意減肥：「唔係減㗎，減肥係好辛苦嘅任務嚟㗎！新加坡好多嘢食，食吓麵、粉咁，會煲吓湯同埋涼茶。我冇減，飯只吃半碗，肉類吃雞肉、豬肉、海鮮，不吃牛及羊。我唔食麵包，食麵包一定要搽呢樣嗰樣，我搽都係新加坡嘅綠色咖吔，食斑蘭葉嗰種香味，嗰個香好多，烘好個麵包再搽嗰隻嘢，真係攞你命！」對於健康狀況，她坦言：「係血糖高咗少少，問題不大。我好注重健康，有定期做身體檢查。完全冇事。」
馬健晉長大終體諒朱咪咪
作為圈中的「隱形富婆」，外界盛傳朱咪咪在新加坡、馬來西亞及香港坐擁近十個物業，身家豐厚。對此她笑說：「而家香港冇屋住，租晒出去！」她透露以前賺到的錢多數用來買磚頭保值，這份未雨綢繆源於貧困的童年回憶：「可能以前細個嗰陣好唔掂，我哋間房剩係得一張大床，上面再搭碌架床，11個人住一間尾房，再窮再苦嘅日子都係咁過。我喺物質上冇乜追求，一件衫可以着幾年，富唔富睇你自己覺得幾多錢先係貧。」
然而在兒子成長過程中，朱咪咪因工作長期缺席，曾引來兒子的埋怨，尤其是幼子馬健晉。他曾坦言童年時不滿母親經常在外工作：「由我有記憶嘅時候，已經知道媽咪大部份時間都唔喺屋企。返學聽到啲同學講『我媽咪帶我去呢度、嗰度玩』，但係我個人係好少呢啲機會，因為我好少有機會同媽咪接觸。媽咪成日返工冇時間陪我哋，如果我哋約定咗一個時間去做呢件事，佢有時因為要開工需要取消，所以細個真係幾唔開心，因為媽咪成日都唔喺度。」隨着年齡漸長，馬健晉終於理解母親的苦衷：「大個咗開始見多咗啲人同事，我先發覺媽咪係為咗畀我哋有好嘅生活環境，所以先咁搏命做工，我先體諒到佢唔係唔想陪我哋，只係想為呢個屋企付出多啲。」
相關閱讀：朱咪咪過億身家都畀仔嫌棄 曾與老公兒子長期分居：兩個仔當初好唔鍾意媽咪
朱咪咪知足常樂修復母子情
朱咪咪亦曾感嘆當年將兒子送回新加坡生活時，大仔同樣感到失落與難以釋懷：「我知兩個仔當初好唔鍾意媽咪，送咗佢哋返新加坡，自己一個喺香港做嘢。但係冇辦法，簽咗合約唔可以唔做。不過近呢幾年，我覺得要將工作減量，唔可以再好似以前咁，由朝到晚做到三更半夜，咁樣好似唔係做人嘅生活態度。」
如今母子關係早已修復，近年減少幕前演出的朱咪咪長居新加坡享天倫之樂，與新抱亦相處融洽。她大方分享婆媳相處之道：「有啲乜嘢我都爭住做，唔係坐喺度做乜，最緊要睇你個心點諗，我而家唔係做家務，只係做運動。我哋搵錢係畀佢哋使，我自己一日都用唔到20蚊坡幣，所以佢哋生活好啲，可以彌補返我細個嗰陣啲不足，唔需要啲仔女跟住我捱。」走過大半生，朱咪咪感慨而知足：「我而家好知足，我會諗自己比好多人幸運，我仲係冇人冇物又冇後台，冇人力捧我，我係一步一步咁唱出嚟。」
相關閱讀：朱咪咪見盡發姣女藝人爭上位 入行半世紀慶幸冇男人緣勸同行帶眼識人丨獨家
