衛詩雅預縫針傷口半年復原 自爆拍戲曾遇「不舒服」對待 籲引入「親密協調員」作橋樑
發佈時間：20:15 2026-10-30 HKT
衛詩雅今日（30日）身穿白色禮服出席活動，她笑言很有結婚時的感覺，又指剛才船停在維港中，想起自己多年前游渡海泳的情景，問到是否想再挑戰？她指若是同一路線也會想，而且更會拉埋老公一起，因為對方喜歡游水。
衛詩雅遺失電子書於機場
衛詩雅早前拍劇集《狩謊》發生意外致上唇受傷要縫50針，今日見她上唇仍貼著膠布，她表示雖然按下去仍有點硬，但已好了很多，又指早已覺得自己受傷位置以後會沒有觸覺，但早前舐自己嘅時候，竟然有感覺，當刻自己也感動得眼泛淚光，至於何時會復原？她則表示應該半年內就可以，現在盡量不化妝不接觸紫外線，好好保護傷口。衛詩雅又透露上星期去了外地，她指此行去是半工作半旅遊，老公也有一起，提到她在網上指本來帶了電子書增加涵養，但因為電子書遺失在機場搞到整個旅程狂食，她坦言確實是食肥咗，但由於這兩星期要進另外一個電影劇組，所以也很節制地令自己瘦返。
衛詩雅叫不舒服一定要出聲
袁澧林與鍾雪瑩早前在社交網爆入行以來多次遭受言語及肢體性騷擾經歷，袁澧林更指曾試過被前輩加錫面戲，衛詩雅指自己也曾經遇過有覺得不舒服的時間：「我覺得最緊要係大家即刻要講出自己嘅感受，當然，男女演員都係！而家諗返轉頭，其實最緊要係當刻一定要講出嚟，男女都好，或者新演員會覺得唔好意思……某程度上好似被逼咁，因為大家喺度等你，你唔拍大家收唔到工，我覺得千祈唔好有咁樣嘅感覺，你唔舒服，就要出聲。」衛詩雅又指提前溝通很重要，若已傾好如何拍，去到現場才say no，可能就是自己不專業，但若然去到現場再加但沒有溝通，這就是劇組的不專業：「嚟嚟去去都係嗰個問題，我哋一定要提前溝通好，唔好話唔好意思，所以唔講。」她又指現在有一個不錯的角色出現，叫做「親密協調」，自己有一個好朋友正在做這樣的工作，認為劇組也可以參考：「佢喺現場可以幫演員同導演做一個橋樑或溝通，好多時唔止演員，就連導演都會尷尬，或者在場嘅工作人員都會唔好意思，如果中間有個咁嘅橋樑我覺得係幾好，大家都可以了解吓呢個崗位。」
衛詩雅拒透露當時人名
問到她指也曾試過不舒服是發生什麼事？衛詩雅就表示已是很久之前，現在也不想大家揣測，所以不講太多，但也覺得若細個勇於表達情況應該會好好多，所以也會教比較少經驗的男女演員要勇於表達：「大家成日都會覺得女演員受傷，其實男演員都會，佢哋可能更加覺得唔好意思，因為男人老狗好咩意思say no，其實唔係，大家都要勇於捍衛自己條界線。」至於張曦雯最近也透露突被要求加除衫戲，她說：「就算在場有幾百個工作人員等緊你收工，你唔舒服一定要講，但我又明新演員有可能會唔好意思，但都冇辦法，因為提前溝通係最緊要，冇可能現場先加，咁咪唔拍住囉，一定要咁樣，同埋講俾信任嘅人聽，所以「親密協調」係幾好㗎！」
