黃妍港鐵素顔遇舊愛險嚇破膽 Michael C按摩𠱁Serrini父母
發佈時間：17:15 2026-10-28 HKT
黃妍、Michael C日前出席「長者港鐵安全運動」，透過音樂向「老友記」宣傳鐵路安全訊息和分享乘搭港鐵時的有禮好行為。黃妍自爆與長者傾談甚有心得，甚至被對方嫌棄「囉嗦」：「佢哋好鍾意分享，因為以前讀書時做義工，去盲人安老院幫長者寫生命回憶錄，同佢哋講少少往事，就好多嘢同你分享。」並笑指車站充滿回憶：「大家成日話『最醜樣』嘅時候，就會遇到你嘅『前男友』，未入行嘅時候我試過收工時間，冇化妝真係殘到嚇死人， 嗰時我好勁近視、戴住副好厚嘅眼鏡，點知一行入車廂就見到個『ex』， 好彩佢冇抬高個頭見到我。（佢同新女友一齊？）佢自己一個，好彩！如果唔係我即刻擰轉面，即刻落車！」黃妍笑言現在充滿自信，重遇舊愛都會主動打招呼。
Michael C慫恿黃妍行性感路線
同場的Michael C慫恿黃妍「變身」性感，令她哭笑不得：「我唔明大家做乜咁想睇我着得性感？如果真係要少布啲嘅話，要預早通知我準備，唔好殺我一個措手不及！我成屋最性感嘅衫已經係運動嘅裝束，俾我慢慢嚟啦。（性感拍劇演戲得唔得？）唔得！」提到最後兩個月衝擊樂壇頒獎禮，黃妍大打「開口牌」希望可在頒獎禮中唱歌，即意味獲取「歌曲獎項」：「係身邊啲人同我講有啲機會，但唔係我可以控制嘅，我只可以唱好每一首歌 。（同炎明熹爭資源攞獎？）我又冇理過，死喇！哈哈哈哈，我係極度『佛系』！」
Michael C赴泰閉關寫歌
至於Michael C就透露自己教健身有助溝通，𠱁得Serrini父母歡心：「我就因為本身係健身教練，而家教Serrini父母做GYM，本來伯母唔想嚟，所以我出動按摩環節幫佢鬆膊頭，搞到佢好relax、好開心。而家每一次都問『幾時按摩啊？』，我就要佢做完運動先得！」。Michael C更斗膽叫黃妍做GYM修身，着她走性感路線突破自己：「其實佢仲好fit，只係做藝人要突破自己，嚟緊我自己都會去開一個結他音樂會，又會飛到去泰國閉關寫歌，希望到時有好好收穫，大家又會賞面攞我啲歌去唱。」
