朱栢康拖KiKi晒幸福大讚靚女又旺事業感激女友接納過去

影視圈

更新時間：12:45 2026-10-28 HKT
發佈時間：12:45 2026-10-28 HKT

朱栢康上月突在社交網站放閃，公開與圈外女友KiKi的合照，昨晚（27日）他帶埋女友出席電影《善男信女》慈善首映禮，大方讓傳媒影合照。朱栢康受訪，提起女友即笑到「四萬咁口」，指兩人拍拖年多，很穩定，上次貼相值一周年，想記錄一下，無想過隔天會有那麼多報道。問到是否在去年獲金像奬男配角前認識？他想了一想稱「是」。女友旺他？朱栢康說：「都係㗎，佢個樣都好旺夫，（幾時拉埋天窗？）我哋冇呢個壓力，過好每一刻先，自然會有好嘅、開花結果嘅事情發生，盡量唔好畀壓力大家。咁慢慢行、認識、學習。」

朱栢康談女友四萬咁口

朱栢康續說，在工作上認識女友，對方算半個行內人；並補充兩人其實認識了一段時間，直至上年溝通得多了，發覺她除了靚之外，性格直率，有內涵，照顧屋企好有愛，「當你揾到一個知道你嘅過去，但係接受你現在嘅人，你真係要好好珍惜。佢對我冇偏見，有陣時你新認識一個人，佢可能因為你外表，或過去，對你有偏見存在。我feel到佢係真係完完全全敞開心扉，想同我交流、認識我、瞭解我成個人係點嘅狀態，喺而家呢個世代我覺得好珍貴。同埋佢唔多垃雜嘢，生活好簡單。」

朱栢康拍拖抱學習心態

至於女友喜歡他甚麼？朱栢康就表示不敢問，他抱學習心態，怕一問自己會有壓力。確實在對方身上學習了很多，從她身上看到自己的狀態。朱栢康表示，自己因工作易䒐䒏，她好有耐性、耐心去傾聽。問到兩人在工作上是否有交接？他表示好快有。認定女友是結婚目標？他說：「我同得一個人一齊就冇後着，盡力過好而家每一刻先，好好咁對佢。當然我哋仲有好多生活上嘅嘢要磨合，我覺得一直行吓，畀心機去經營，經營得好，往後嘅嘢再算。」