鍾慧冰神隱半年終上水 自感「時間無多」爆焦慮 急賣光金器斷捨離：怕睡夢中走咗
發佈時間：14:30 2026-10-22 HKT
1979年香港小姐季軍鍾慧冰今年年初因子宮肌瘤尺寸在兩年內倍增，存在癌變風險，在醫生建議下接受了子宮切除手術。雖然當日手術相當成功，不過鍾慧冰突然消失於人前，亦未有再更新她的YouTube頻道《冰姐的花樣人生》。神隱近半年的鍾慧冰今日（22日）終於現身報平安，親自解釋突然「消失」的原因。
鍾慧冰休養期間精神變得不快樂
在影片中，鍾慧冰表示休養期間雖然身體沒有大礙，但精神上卻變得不快樂：「由今年年頭到而家，不停咁收到一啲好不幸嘅消息。雖然生活咗咁多年，其實都好明白，人生生老病死係必經。但當你面臨咁多人（離世），你知唔知喺嗰段大半年嘅時間，我差唔多每一個禮拜都會收到一個唔好嘅消息，令到我心情好低落。」
相關閱讀：前港姐季軍驚爆切除子宮卵巢輸卵管 插喉瞓病床照片曝光 需全面停工閨密嘆：以後無得生
鍾慧冰對生死有深刻反思與焦慮
鍾慧冰坦言，因身邊不少親人、摯友與演藝界前輩接連離世，令她對人生與生死有了深刻的反思與焦慮：「呢啲問題令到我心情唔係好安樂，引起咗好多焦慮，亦都令我開始反思。我諗人生就係咁嘅，因為我自己都踏入咗晚年生活。可能係物傷其類啦，見到人哋咁，於是我就開始同自己講：『咦，係咪好快都輪到我呢？係咪我嘅時間都差唔多呢？』然後因為好多本來應該做嘅嘢又冇做到，留低好多遺憾。於是我突然間發覺自己好多嘢需要處理，因為我唔希望真係有日，無端端或者喺睡夢中走咗，跟住發覺原來好多嘢係未做嘅。」
結果，鍾慧冰開始採取了多個行動：「我去處理咗好多私人事，包括我嘅財務問題。首先就係將我屋企啲金器賣晒，好彩賣得好好嘅價錢。因為我唔想咁多呢啲嘢擺喺屋企，或者收埋咗唔知擺邊度。另外譬如我啲銀行卡，大部分信用卡都唔要啦，留返兩張就夠，因為我想個人越簡單越好。我又進行咗一次好大型嘅家居翻新工程，因為我覺得自己晚年喺屋企嘅時間好長，想送一份禮物畀自己。呢份禮物就係用嚟迎接我未來70歲以後嘅日子，我希望環境可以令我舒服啲、開心啲。基本上呢幾個月我主要就係忙緊呢啲事。因為有情緒問題，加上屋企裝修，中間又拍咗部電視劇，所以做唔到YouTuber。當情緒唔係好穩定嘅時候，其實好難同大平心靜氣咁傾偈，甚至去進行訪問。」
鍾慧冰終於排解焦慮
幸好休息了一段時間後，鍾慧冰終於排解了焦慮，情況好轉並再次現身。鍾慧冰透露，她本來與資深演員梁珊有一個合作計劃，打算尋找一些左派藝人和幕後工作者進行訪問：「佢（梁珊）好興致勃勃，我話我去負責聯絡團隊，試下搵錢去製作呢啲影人歷史，我哋一直都有通電話聯絡。但到咗今年年頭，我自己要做手術，就同佢講我呢排都好唔舒服，要唞一排先。點知唞完冇耐，就收到消息話佢已經離開咗。當日我收到佢個仔嘅WhatsApp，話媽媽已經走咗，我覺得好突然。當然佢都好高壽，但我都覺得係一個好大嘅遺憾。突然間發覺，原來好多嘢講咗要做就要做，如果唔係有時就會變得太遲。」
好友相繼離世令鍾慧冰情緒波動
除了梁珊之外，King Sir（鍾景輝）與世長辭，亦令鍾慧冰感到很遺憾，而最令她情緒波動的，還與兩位朋友有關：「我諗令到我情緒特別唔舒服嘅，亦都同兩個朋友有關係。一個係吳文忻，一個係陳敏兒。坦白講，我同佢哋兩個都唔係深交，但係我哋有緣。由上年開始一齊喺冥想班做同學，所以差唔多每個禮拜都見到佢哋，一齊學習冥想。突然間聽到一個走咗，另外一個又走咗，一個一個咁離開，令到我突然間覺得好焦慮、好唔舒服。我覺得需要時間令自己心情平伏，同埋開始覺得要處理好臨走前應該處理嘅問題。至於點解我呢幾個月又可以走出焦慮，好開心咁行返出嚟？就係因為喺呢幾個月裏面，有朋友介紹我認識咗一位氣功師。呢位氣功師教咗我一個好好嘅方法，就係學點樣去曬太陽。原來曬太陽真係可以令我嘅情緒更加快樂、更加開心、更加平穩。」
相關閱讀：69歲前港姐子宮肌瘤倍增恐癌變北上做手術 談內地五星級手術體驗勝香港：好有愛
