江美儀揭轉投TVB遭排擠大爆無情派系鬥爭：完全當我透明人被冷暴力患驚恐症

更新時間：14:00 2026-10-20 HKT
發佈時間：14:00 2026-10-20 HKT

視后江美儀入行逾30年，演技備受肯定，但背後走過的路絕非一帆風順。日前江美儀作客YouTube頻道《巴打圍爐》，在受訪時罕有打開心扉，憶述當年從亞視（ATV）轉投TVB後，曾經歷的文化衝擊與人事風波。江美儀坦言在TVB曾遭遇冷眼與孤立，情緒崩潰至誘發驚恐症，甚至需要求醫服藥。

江美儀昔日亞視同舟共濟

江美儀談及兩家電視台的工作文化，雖然亞視資源匱乏，但同事之間感情深厚、互助無間：「因為我哋嗰時喺一個弱嘅電視台，大家只有一個目標，就係要做好。冇咁多嘢要爭，你爭咩？根本就唔夠人，你最好唔好叫我做，大佬，從早做到晚。我早上可能要做婦女節目，下午又要去拍外景，夜晚再入廠。」當時同台藝人都會互相幫助。

江美儀初入TVB驚見派系

但江美儀轉戰TVB後，職場生態的巨大落差讓她措手不及，她爆料指私下交往都可能引來非議：「你突然去到一個地方，唔係咁樣。好似明明尋晚仲同你食飯，但今日好似唔想喺咁多人面前同我講嘢？可能有人將你歸到A組，我係B組，你係C組。但我哋其實都係朋友，但到咗嗰個場合，A組嘅人見到你就會問，『你點解同B組嘅人傾偈？』、『你點解同C組嘅人講嘢？』我覺得係咁嘅感覺。」

江美儀遭孤立誘發驚恐症

隨著工作機會增多，隨之面對的卻是無情的冷暴力。江美儀感嘆「不招人妒是庸才」，但在競爭激烈的環境中，旁人的迴避與排擠讓她深感委屈：「喺一個咁多人嘅機構，又咁弱肉強食嘅環境裡面，你稍微有表現，一定會被人講。你會發覺返到公司冇人同你打招呼，係真係冇人，擦身而過完全當你透明人。你主動打招呼，對方好似覺得『你一個被針對嘅人，如果我同你打招呼，我也會惹上麻煩』。你可以話我幼稚或者單純，因為我以前嘅公司冇呢啲嘢，返去好不開心，就抱住小狗喊，覺得自己好委屈。」

江美儀抱狗痛哭要求醫服藥

在情緒日積月累下，江美儀引發嚴重的心理與生理病徵：「我最嚴重嗰陣要睇心理醫生，我要食藥。我經常會覺得Why，但最大的問題是呢個『Why』，其實冇答案，發生咗就係發生咗。因為有驚恐症，症狀好快就會出現，透唔到氣、失眠、發噩夢、好驚見人、心跳、手震，第一時間係打畀醫生求助。」

江美儀獲阮兆祥伸出援手

在面對情緒困擾與前夫鬧離婚的人生低谷期，江美儀當時正與阮兆祥在劇中合作，二人飾演情侶。阮兆祥察覺到江美儀的異樣，及時伸出援手：「其實嗰時我同前夫開始鬧離婚，我同阮兆祥拍劇，佢見到我真係唔開心，佢有一日跟我講：『喂！有個地方我帶你去，慈山寺。』嗰時寺院仲未對外開放，佢帶我去逛。之後我覺得好舒服，覺得自己係唔係可以多來呢個地方讓自己平靜一下？所以我要多謝阮兆祥帶我去慈山寺。」