陳凱詠自揭曾遭性騷擾被摸胸掂腰 力撐袁澧林勇敢發聲
發佈時間：14:46 2026-10-13 HKT
陳凱詠（Jace）今日（13日）出席品牌活動，袁澧林（Angela）昨晚（13日）在IG發千字文，勇敢揭露自己入行以來多次遭言語及肢體性騷擾、無故被「性化」和矮化的經歷，痛批演藝圈、文化界根深蒂固的厭女文化與系統性不公，同時控訴遭男記者性騷擾，自爆入行後遭前輩強吻。
陳凱詠︰尊重女性啦
陳凱詠明言，看完該文章後，明白當中意思，「內心拍晒手掌！」問可遇過有人向她說侮辱性的說話？她說：「我覺得呢個係成個文化，大家要留意嘅嘢。有時可能講者無心，但唔係一句就大晒！始終我哋做呢行，女仔無論幕前、幕後，有時衣著可能好似我今日咁樣，有啲人覺得講出嚟係讚美，原來女仔聽起嚟會覺得唔尊重、或者嚇親！咁我哋係咪做呢行要食晒（容忍）呢？定係不論男女，我哋意識可以再加強多啲？尊重多啲？我覺得多啲討論，大家睇吓點樣做好啲。」
陳凱詠曾遇言語騷擾
陳凱詠明言遇過被騷擾的情況，「可能無心嘅，例如拍戲，有人會話︰『等我擺個鏡頭高炒先』、『裝個POV（視角）望先』……其實我聽到呢啲說話，啱啱入行又好新，會好驚，心諗︰『佢真係會咁做』？我都未必次次夠膽出聲。我當然非常鼓勵所有女生為自己爭取，為自己去發聲。我嗰陣時嘅講法係：『喂，你唔好咁講喎！我會唔舒服喎！』當時嗰個人都會話：『無心㗎！』不過唔係個個女仔都夠膽出聲。我甚至遇到可能再過份啲，會手多多！」
陳凱詠遭摸胸
陳凱詠續說，好多人以為香港女生好勇敢，被騷擾時會夠膽出聲，她指，其實在無預期環境下遇到會好愕然。問再遇類似事件會怎樣？會出聲，她說：「我絕對希望每次都出聲！（考黑帶資格先？）我哋唔好用暴力解決。我覺得尊重，係男性、女性都要做嘅嘢，係對人尊重。」再追問她被人手多多一事，是摸到哪部位？她以動作示範被對方手觸及胸部、腰部位置。
陳凱詠拍《悠長假期》同AK談情
另外，問有份演出ViuTV港版《悠長假期》的進度，陳凱詠表示快將拍完，劇中同AK（江爗生）有感情線，無親熱戲，指所演的角色有別原著日版，相比下港版更有故事性。提到11月有份演出「國泰西九爵士音樂節」演出，她指十分期待睇許志安表演。
