劍橋學霸港姐施宇琪拒當花瓶 決心轉跑道投身金融主持界：要做天賦型選手
發佈時間：15:02 2025-11-16 HKT
2025港姐亞軍由施宇琪（Angela）得獎後一直備受外界關注，事後她以一級榮譽成績畢業於英國劍橋大學，畢業後施宇琪回港發展，曾在高盛實習，其後加入摩根士丹利擔任股票期權交易員，擁有五年金融業經驗，成為港姐亞軍後，施宇琪更更簽約成為TVB的親生女，早前與季軍袁文靜主持《攻你上大學》。
施宇琪決定追隨自己興趣發展
不過施宇琪日前在小紅書拍片稱自參選港姐以來，對於未來的發展方向一直感到迷茫，經過一番深思熟慮，施宇琪最終決定追隨自己的興趣，向主持兼財經博主、財經主播發展。施宇琪又稱將申請攻讀財經新聞碩士，目標鎖定香港、北京清華及美國哥倫比亞大學，還向各大品牌及公關公司毛遂自薦，希望能有機會擔任活動主持人。
相關閱讀：港姐亞軍施宇琪「黑歷史」舊照流出 2年前厚切凸腩令人側目 為選美寧捨棄健康？
施宇琪確認會向主持兼財經博主財經主播發展
施宇琪在片中向所有品牌方和PR毛遂自薦，希望可以考慮請她去做主持：「我喺TVB做過主持、自媒體做過人物深度採訪、我會講說笑話。雖然我唔係白富美、唔係白幼瘦，但至少我會做功課。中文、英文、普通話、廣東話乜嘢都得，你搵我，我一定會嚟。」施宇琪亦正式宣布確認會向主持兼財經博主、財經主播發展：「講真，選完港姐之後，我係非常之迷茫嘅。我一路喺度諗，一年之後到底我返去做金融呢？做交易呢？定係做藝人呢？我真係唔知道自己想要啲乜嘢。不過好幸運，今日終於知道啦！第一，我認為主持或者財經主播，需要嘅條件同我本身嘅綜合條件係極度吻合嘅。我清晰地知道自己有咩優點、有咩缺點。講實話，做藝人我顏值唔夠，不過好彩，我形象成熟、聲線沉穩，我有足夠嘅知識量同埋詞彙量，中英流利。呢啲條件係非常適合做主持同財經主播嘅。」
施宇琪獲新聞學榮譽教授讚是天賦型選手
施宇琪續說：「我人生嘅追求一直都係豐富嘅體驗同成就感。做Trader（交易員）雖然可以賺好多錢，不過錢唔係我嘅priority（優先考慮）。最重要嘅原因就係主持人永遠都唔會俾AI取代。Trader有可能俾AI取代。我做trader我唔知做到60歲，不過主持人應該可以，因為永遠唔會有人想俾一個AI或者robot去提問，亦都冇人會想睇AI robot報嘅新聞嘛！所以，主持人呢份工作係唔會俾AI淘汰，所以我係要踏入呢個行業。」而下一步計劃，施宇琪則說：「我會報一個Master in Business Journalism（財經新聞碩士）。我會報香港嘅大學啦、我會報清華、我都會報Columbia（哥倫比亞大學），睇吓邊一家會收我。點解有呢個決定，因為我遇上咗Journalism（新聞學）最榮譽嘅教授，跟住佢同我講，我應該走呢條路，佢覺得我係天賦型選手。」
相關閱讀：港姐2025丨亞軍施宇琪曾被連登仔力追 7年前照曝光一原因惹狂蜂浪蝶 後續發展引網民讚人美心善
施宇琪向經理人商量去TVB財經台
施宇琪昨日在沙田馬場出席活動，被問到TVB是否知情？施宇琪表示：「唔知㗎，但係我有打過畀經理人，問過佢我可唔可以去TVB財經台，我係有同佢商量過，但唔知可唔可行，我要讀咗書先，讀完專業啲，咪會有多啲機會。」她亦解釋不想做演員的原因：「因為唔夠靚，同埋我係好易肥，要我Keep一個藝人瘦嘅身材，我每日只可以食800卡路里。變咗我做唔到藝人嗰種瘦，何必呢？我而家咁嘅狀態可以做主播，但就做唔到演員，做人要向自己擅長嘅嘢去進發嘅，我擅長財經，又擅長吹水，只要我唔係殺人放火，屋企人都好支持我。」
