岑樂怡離巢ViuTV後追導演夢 將自家創作小說改編成電影
發佈時間：00:34 2025-11-04 HKT
岑樂怡（阿妹）今年宣布離開ViuTV，回復自由身後，發展路向似乎更廣闊。正忙於做導演的她，目前為短片比賽而努力：「而家每一日我個腦袋都塞爆咗，因為以前做演員，接觸嘅嘢有限，而家睇到成個格局，其實理解咗好多以前唔明嘅嘢，每一日都好有趣。」她更坦言下一個目標就是拍電影，將現正撰寫的小說改編成長片。
岑樂怡參加微電影短片比賽
岑樂怡一直以來都是以主持、演員等幕前身份被觀眾認識，但近來她最忙碌的，卻是幕後工作。原來她參加了《第十三屆微電影「創+作」支援計劃（音樂篇）》短片比賽，並成功過關斬將入圍，男主角更是RubberBand主音6號（繆浩昌）。岑樂怡：「其實一向都想拍電影做導演，我而家自己寫緊本小說，想將佢化成長片，由於未做過導演嘅緣故，開始參加下啲短片比賽，想操練下先。好期待完成本小說，就可以申請拍長片，一步一步咁做。 」
至於由幕前變幕後，原來非一時之興：「我由細到大都好鍾意戲劇，雖然有做演員，但又不拘只係想做演員，幕後寫故事、諗嘢、睇鏡頭語言，都好細個已經有呢個諗法。 『創+作』唔好睇小佢，其實都好繁複。而家每一日我個腦袋都塞爆咗，同埋個whatsapp group好熱鬧，因為有好多突發事情要處理，而家睇到嘅嘢都幾得意，因為以前做演員，接觸嘅嘢有限，而家睇到成個格局，其實理解咗好多以前唔明嘅嘢，每一日都好有趣。拍好『創+作』係成為我短期目標。」
岑樂怡熱愛行山支持環保
談到現時遇上的挑戰，阿妹思考了一會，卻認為挑戰反而讓她有所領悟，「最難係變化同等待，有啲嘢突如其來變你冇諗過，但有時又會成為一啲契機。個天攞走你一啲嘢好似世界末日咁，但原來係有原因，如果你理解到個啟示，用咗佢，可能會令劇本豐富咗，令製作更加精彩。」
岑樂怡熱愛行山、大自然，亦與她一直奉行的環保理念相乘，「呢個就冇停過一路都有做，好多團體都會邀請我去分享環保感受，我都會話，好呀好呀夾到時間一定去，希望大家會接受多啲環保呢樣嘢。 」
她更直言，這些年間曾有些工作與理念相抵觸，而她會選擇有錢都不賺！岑樂怡：「我覺得非常唔容易㗎，我都幾欣賞自己把關把得幾好。有時接工作或者廣告邀請，去拍嘅時候，可能嗰個產品同你嘅理念有抵觸，我就唔會接，都搵少好多錢！呢個係我堅守嘅原則，而好處就係發聲都會有用啲，尤其環保分子喺香港係超級小眾，都好多負面嘅標籤喺佢哋身上，如果有個人很企出嚟講多啲，力量上都畀多啲正面嘅感覺佢哋，同佢哋講佢哋唔孤單，大家都努力中！ 」滿有使命感地成為環保的推動代表。
山系女孩為慈善轉為練跑
岑樂怡（阿妹）雖已回復自由身，但對慈善工作的熱誠卻沒有變。最近她擔任慈善跑活動的「星級英雄」，不單是鼓勵大家參與，連一向是「山系女孩」的她都決心成為跑手，岑樂怡：「知道係幫人我就好易話為，冇諗太多（就參加）。佢哋都有問我有冇跑開步，我其實就行山多，跑步就比較業餘。」活動中有不同難度的比賽，阿妹笑言不敢一下子越級挑戰，視乎自己的能力再決定跑多長。
