金像男配角馮皓揚遭「前校長」怒斥忘本 稱用盡人脈推佢上金像獎：背後插我一刀
發佈時間：16:21 2025-11-04 HKT
21歲的馮皓揚（羊羊）憑電影《媽媽的神奇小子》於2022年奪得金像獎「最佳男配角」，之後一度加入TVB藝員訓練班，卻上一日堂便火速退學，鬧出傳不滿「藝訓班星級導師」風波。前小童星訓練學院創辦人Momo校長今日（4日）在IG上載影片，點名馮皓揚忘本，還斥對方「插我一刀」、「謀財害命」。
Momo校長揭傷疤
Momo校長留言：「成三年幾啦，我諗咗好耐，今日決定將塊傷疤揭開。點解？就係想用我嘅教訓，等所有心腸好、成日無條件付出嘅人睇清楚，學識點樣保護自己，千祈唔好好似我咁，做咗老襯至嚟後悔。#第40屆金像獎男配角 #馮皓揚」。
相關閱讀：金像獎最佳男配角馮皓揚退修TVB藝訓班 疑與預期有落差
Momo校長在片中表示：「我親手將我嘅學生栽培成第40屆金像獎男配角，點知我冇諗過換嚟嘅係佢兩母子，喺我背後狠狠咁插我一刀。」Momo校長指有家長曾向她表示：「話冇錢交學費，求我畀個小朋友免費嚟上堂，我心軟就應承咗。點不知我後嚟發現原來佢屋企係開髮型屋，同埋做生意㗎！」
Momo校長對學生如親兒子般栽培：「我收咗幾年學費，傾囊相授，用盡人脈，推佢上金像獎嘅舞臺，佢亦都冇令到我失望，攞到第40屆金像獎男配角。」Momo校長指對方為前途提出解約：「佢17歲嗰年我因應佢嘅要求，同佢無條件解咗本身簽咗10年嘅藝人合約，親手送咗佢入更大嘅舞臺。」
Momo校長直言要帶眼識人
Momo校長最心寒的是，在領獎的前兩日其母親舉動：「佢媽媽嚟咗我屋企度食飯，佢當時嘅一句說話，真係令到我好愕然。佢話點樣先至會令到我唔會原諒一個人，我當時仲回答佢，如果有人蓄意令到我舊病復發，我一定唔會原諒佢。」兩日後Momo校長坐在台下見證學生獲獎，但對方一句感謝她的說話都沒有，更與Momo校長劃清界線。
Momo校長感到被背叛：「佢為咗劃清界線，仲要同人哋講我哋嘅課程唔係咁正規，周圍咁唱我，完全否定咗我5年嚟嘅心血，同埋專業。最終佢仲選擇謀財害命，嚟結束我哋呢一段關係。」Momo校長直指兩次的教訓，令她睇清楚無條件的仁慈，其實是讓他人有機會傷害自己，為此領悟到三個道理，「要保持心地善良，但要帶眼識人」、「不要輕易信人，一但心軟有機會損失慘重，遍體鱗傷」、「對方不珍惜自己的好心，要立即斬欖」。
馮皓揚曾是訓練學院「生招牌」
巫麗儀（Momo）校長原是家庭主婦，在13年前一個偶然機會下，開始做中介照顧演員，建立人脈後，加上獲童星女兒細Mo啟發，在2016年7月創辦小童星訓練學院（Momo Casting Talent School），報讀訓練班可在演技、唱歌、跳舞「進修」。訓練學院開業僅一年，學生人數已有200人，馮皓揚於11歲時加入學校，曾拍過節目、廣告、劇集，成為訓練學院的「生招牌」。
相關閱讀：馮皓揚後悔放棄讀書入行想再進修 金像男配再演殘障人士曾經唔開心丨獨家
