葉蒨文反擊整容指控！晒18歲素顏照分析「開眼頭」魔鬼細節：邊個咁得閒割完對眼植返啲毛

更新時間：21:00 2025-09-08 HKT
發佈時間：21:00 2025-09-08 HKT

女神配對計劃｜葉蒨文（Sophie）因為演出TVB戀愛真人騷《女神配對計劃》，與曾展望（GM）被視為CP人氣急升，二人更以「情侶檔」接活動，又一齊擔任港姐司儀，拍住上搵真錢。不過最後有網民翻出葉蒨文於2016年選港姐時的照片，質疑是否曾整容。

葉蒨文圖文並茂澄清

葉蒨文對昔日舊照惹出整容疑雲，甚為憤怒，日前在IG及threads上出帖文反擊，圖文並茂為自己澄清。葉蒨文於深夜發長文怒轟黑粉，又公開18歲時的素顏照，葉蒨文留言：「唔好意思，嗰陣時三年冇剪頭髮，披頭散髮，冇化底妝，仲要畫咗條Kam眉同眼線。第一輪面試都算係大熱嚟㗎，有圖有真相。」

葉蒨文用舊相做對比：「我其實真係唔覺得依家五官都認唔到我，少少誇張喎，黑粉們。」對於被指「開眼頭」，葉蒨文寸爆反擊：「仲要話我開眼頭先好笑，你知唔知開刀嗰啲眼頭唔會好似我咁，笑嘅時候眼頭肌肉彎彎地向下㗎？同埋拍攝近鏡時，我連眼頭都有眼睫毛㗎，即係有毛囊啊！你覺得邊個咁得閒割完對眼植返啲毛囊去個眼頭度？」葉蒨文又批評黑粉的言論，比起她選美時的髮型更差。

葉蒨文留言安慰粉絲

葉蒨文之後再留言安慰粉絲：「最重要係你搞到我啲粉絲啊，我出名錫粉絲嘅！你要佢哋同你拗，又為咗我嬲，所以我想喺度同我嘅粉絲講，呢段時間要你哋操心了。唔使理呢啲人，唔好太生氣，同埋換一個角度諗，佢哋係覺得我變好咗先咁講啫。咁好老實講，人生都係求進步同埋想變得越嚟越好，所以我都會越變越靚，亦都會越變越好，你哋唔使咁生氣，嬲呢就傷身啦！咁同埋多咗輿論都係一種宣傳啦，知道你哋錫我啦！乖乖，愛你們」。

↓立即下載星島頭條App↓