女神配對計劃丨曾展望攻陷葉蒨文 Sophie揀同GM過夜同睡一床？一女神竟指不接受同居
發佈時間：23:00 2025-07-27 HKT
女神配對計劃丨由林盛斌（Bob）擔任金牌媒人兼主持的TVB戀愛綜藝真人騷《女神配對計劃》，今晚（27 日）播出最新一集，5位女神葉蒨文（Sophie）、李芷晴（Stephanie）、羅毓儀（Yuki）、關嘉敏（Carman）及梁敏巧（Maggie），進入Dating Camp玩「心意配對遊戲」，期間葉蒨文同GM曾展望甜蜜滿瀉；而於營中一條問題亦惹起熱議。
曾展望葉蒨文鼻貼鼻極甜蜜
GM曾展望答中問題，再次獲得與Sophie玩親密互動遊戲壬的機會，「女神和男士需鼻尖碰鼻尖10秒，途中不能分開」，GM曾展望見到題目十分開心，即時表示「可以改一改個秒，變10日！」二人鼻尖觸碰一刻開始後，Sophie表現十分緊張，中途更一度笑住向後縮。之後在一片「未有十秒呀」的起哄聲下，兩人的鼻尖再度黐實，之後因為Sophie太激動而再重新再玩，期間有人表示：「玩到聽朝呀」、「特登嘅你一定係」、「我好似睇咗婚禮錫十秒嗰啲咁」。
相關閱讀：女神配對計劃丨葉蒨文「狠撇」前度遭家人朋友質疑兼不諒解 撰長文罕談分手原因：再等唔到落去
葉蒨文直接指自己出軌
之後Sophie接受製作組訪問時候，仍然顯得十分冧豬，更自認在GM曾展望面前做不了平時強勢的自己：「唔知點解GM嘅佻皮，搞到好似我都變咗小女孩咁咯。我有時見到佢笑笑吓，咁我又忍唔住就咁樣咯。」之後葉蒨文和Eddie玩遊戲，大家要用口傳紙杯，葉蒨文竟然指自己似出軌。最後GM亦順利得到同葉蒨文過夜的機會。而在預告當中，二人過夜時帳幕內竟然由兩張床變為一張床，難怪葉蒨文大發嬌嗔。
梁敏巧：不可以同居
今集其中一個焦點，就是節目組問女神們的其中一條問題，問題為「女神需要結識多久，才可以同居？」，5個女神之中，葉蒨文同李芷晴都揀「隨時」，葉蒨文指當和男朋友有共識就可同居，而李芷晴就指「睇Feel」，林盛斌指即等同揀「隨時」。反而梁敏巧就揀「不可以同居」，令其他4位女神十分驚訝，梁敏巧表示「我覺得同居係婚姻嘅絆腳石，結咗婚就唔會再諗後路，你會好好嘗試去磨合，但係同居就可以褪，所以同結婚係完全唔同」，其餘4位女神對此想法都嘖嘖稱奇。
李芷晴爆喊怕孤獨終老
李芷晴於玩「心意配對遊戲」時，就曾不止一次「獨守空房」，主持人林盛斌入房內安慰李芷晴時，李芷晴竟然爆喊。李芷晴問林盛斌：「我會嫁唔出喇，係咪呀？」、「係咪我真係要檢討吓自己？…會唔會諗嘢有啲奇怪」之後李芷晴續就自揭，自己多年在感情路上十分不順利。「一路都未搵到好了解自己或者好適合嘅人啦…我真係好擔心我會唔會孤獨終老」。
相關閱讀：女神配對計劃丨梁敏巧有兩個筍盤追求者唔滿足？與關嘉敏公然爭仔 iBanker黃家俊成搶手貨
