女神配對計劃丨葉蒨文「狠撇」前度遭家人朋友質疑兼不諒解撰長文罕談分手原因：再等唔到落去

更新時間：17:00 2025-07-23 HKT
發佈時間：17:00 2025-07-23 HKT

女神配對計劃丨TVB戀愛綜藝真人騷《女神配對計劃》自從播出後在網上製造了不少話題，外間關心五位女神梁敏巧（Maggie）、李芷晴（Stephanie）、關嘉敏（Carman）、葉蒨文（Sophie）及羅毓儀（Yuki）最後情歸何處。在周日（20日）播出的第七集，Dating Camp 對戰環節，多位求愛勇者出盡全力爭取最好住宿與女神過夜。

葉蒨文撰長文剖白選擇分手的歷程

雖然林堡熙（Eddie）忽然發力急起直追，其勇猛表現成功令葉蒨文好感度飆升，不過未有曾展望（GM）在葉蒨文心中的地位。葉蒨文當時更自揭了一個驚人秘密，原來因為前度的關係，足足六年沒有去過旅行：「嗰陣疫情佢有啲困難，或者生意上佢心情各樣嘢都唔係好好，咁我就一路陪住佢啦。」想不到事件竟受到網民關注，葉蒨文昨日（22日）更在IG分享長文剖白選擇分手的心路歷程。

葉蒨文曾被質疑為節目扮單身

被網民譽為「全TVB最靚女藝員」的葉蒨文，近年因為《愛‧回家》「Candy」而成功入屋，不過這位索爆小花葉蒨文早已「封盤」，她曾公開承認有一個拍拖多年的圈外男友「啤梨仔」，在2022年曾因不忿與鍾培生傳緋聞而晒與男友合照證清白並撰長文反擊，她曾表示今次緋聞令兩人感情更堅固，但想不到在今年情人節，葉蒨文表示已回復單身：「今個情人節冇情人，公司可唔可以搞個戀綜幫我搵？」雖然當時曾有網民質疑為參加《女神》而扮單身，但葉蒨文否認：「我同前任喺相處上出現咗問題，而呢個問題係出現咗好耐，我哋都協調咗一段時間，自己都試咗唔同方法，好努力經營呢段關係，但最後都係覺得唔適合，我就決定分開。」

葉蒨文稱分手後遭朋友質疑兼家人不諒解

事隔多月，葉蒨文因在節目中剖白而令觀眾動容，昨日葉蒨文在IG撰長文，罕談拍拖6年的前度男友，剖白內心感受與二人分手原因。原來當時葉蒨文身邊許多朋友對她決定分手一事而不理解，再加上前度是公認的「好好先生」而質疑她：「好多人知啲唔知啲在心裏面會judge我：咁好，你都分手好似我有毛病咁。」甚至連家人都不太諒解，全文如下：

星期日嗰集《女神配對計劃》最深刻嘅
我以為會係同男嘉賓嘅互動
但係竟然係日本之旅嘅故事

我完全冇諗過節目組會剪落去
以為嗰一段冇乜同人互動嘅效果
對於其他人嚟可能比較悶嘅內容未必會剪接出來
估唔到哈

講嘅時候我都算淡淡然
睇嘅時候我都冇乜感覺
但係當我見到大家嘅DM同埋評論區嘅留言
我忍唔住眼泛淚光
特別係嗰句： #東京之旅一早比一世遙遠
嗰一下自己好似係全世界面前講咗一樣一路放咗喺心入邊嘅嘢
然後有一種被明白、一種釋放咗嘅感覺
特別係見到有人DM同我講諗起自己嘅經歷
好明白呢種等待咗另一半好耐嘅感覺
我覺得除咗有人明白
甚至有啲感謝呢啲遠方網友嘅安慰

我記得當時我嘅另一半係一位好好先生
大家都會覺得佢好錫我、對我好好
而且佢都係一個冇乜脾氣嘅人
所以一路都會覺得呢段關係一定係佢遷就我比較多
嗰陣時分手
好多人知啲唔知啲在心裏面會judge我：咁好，你都分手
好似我有毛病咁
好多出面嘅朋友唔係太熟嗰啲
知道我分手嘅呢個消息
都send message嚟一人一句、雪上加霜
大家都係識少少扮代表
安慰我嘅人真係得身邊了解我嘅三五知己同埋老師

我都冇解釋太多
講多無謂
我忠於自己嘅決定
我亦都知道自己點解要咁樣做

我記得當時剛分手的我坐咗喺一間西班牙餐廳入邊
面對住我嘅父母
佢哋看似輕鬆撩我傾偈
然後慢慢由淺入深、步步追問
屋企人問我點解要做呢個決定嘅時候
我睇到佢哋眼神嘅不解同批判

我覺得好難將啲六年半嘅感情逐一訴說
究竟用咩角度講？
就算用咩角度都對呢件事唔公平
既然分開咗我都唔想影響佢哋對我個EX嘅觀感
我亦都覺得有時分開唔係邊一個嘅錯
我淨係知道嗰六年
我見到身邊嘅朋友會同另一半去旅行我都會好羨慕
我都會睇佢哋嘅分享去感受嗰種喜悅
面對一次又一次，日復日、年復年嘅期望落空
一直好努力、堅強咁去支撐住另外一個人
我知道個一種感受只會我自己最明白
於是當時我收起呢一種無人會明白我感受嘅心情
深呼吸一口氣
我最記得我講咗一句：
總之
我等咗六年嘅日本之旅
我知道自己再等唔到落去啦

講完我努力將我眼框裝滿嘅淚水連埋啲食物一齊吞返落去
安安靜靜咁食埋呢餐飯
佢哋亦因為見到我呢個狀態佢哋都冇再問落去

有人問點解唔自己一個去？同朋友去？
咁當然可以咁做啦
但係個重點並唔係去旅行
呢個日本之旅嘅等待係一種象徵
係一種我對於浪漫嘅期許同埋我嘅承諾！
總之
下次如果我有男朋友我一定要佢同我去一次日本旅行！
我想畀佢睇我着和服！
我想同佢去環球影城！
我想影好多靚相留低好多回憶！
就係咁！