女神配对计划丨叶蒨文「狠撇」前度遭家人朋友质疑兼不谅解撰长文罕谈分手原因：再等唔到落去

更新时间：17:00 2025-07-23 HKT
发布时间：17:00 2025-07-23 HKT

女神配对计划丨TVB恋爱综艺真人骚《女神配对计划》自从播出后在网上制造了不少话题，外间关心五位女神梁敏巧（Maggie）、李芷晴（Stephanie）、关嘉敏（Carman）、叶蒨文（Sophie）及罗毓仪（Yuki）最后情归何处。在周日（20日）播出的第七集，Dating Camp 对战环节，多位求爱勇者出尽全力争取最好住宿与女神过夜。

叶蒨文撰长文剖白选择分手的历程

虽然林堡熙（Eddie）忽然发力急起直追，其勇猛表现成功令叶蒨文好感度飙升，不过未有曾展望（GM）在叶蒨文心中的地位。叶蒨文当时更自揭了一个惊人秘密，原来因为前度的关系，足足六年没有去过旅行：「𠮶阵疫情佢有啲困难，或者生意上佢心情各样嘢都唔系好好，咁我就一路陪住佢啦。」想不到事件竟受到网民关注，叶蒨文昨日（22日）更在IG分享长文剖白选择分手的心路历程。

叶蒨文曾被质疑为节目扮单身

被网民誉为「全TVB最靓女艺员」的叶蒨文，近年因为《爱‧回家》「Candy」而成功入屋，不过这位索爆小花叶蒨文早已「封盘」，她曾公开承认有一个拍拖多年的圈外男友「啤梨仔」，在2022年曾因不忿与钟培生传绯闻而晒与男友合照证清白并撰长文反击，她曾表示今次绯闻令两人感情更坚固，但想不到在今年情人节，叶蒨文表示已回复单身：「今个情人节冇情人，公司可唔可以搞个恋综帮我揾？」虽然当时曾有网民质疑为参加《女神》而扮单身，但叶蒨文否认：「我同前任喺相处上出现咗问题，而呢个问题系出现咗好耐，我哋都协调咗一段时间，自己都试咗唔同方法，好努力经营呢段关系，但最后都系觉得唔适合，我就决定分开。」

叶蒨文称分手后遭朋友质疑兼家人不谅解

事隔多月，叶蒨文因在节目中剖白而令观众动容，昨日叶蒨文在IG撰长文，罕谈拍拖6年的前度男友，剖白内心感受与二人分手原因。原来当时叶蒨文身边许多朋友对她决定分手一事而不理解，再加上前度是公认的「好好先生」而质疑她：「好多人知啲唔知啲在心里面会judge我：咁好，你都分手好似我有毛病咁。」甚至连家人都不太谅解，全文如下：

星期日𠮶集《女神配对计划》最深刻嘅
我以为会系同男嘉宾嘅互动
但系竟然系日本之旅嘅故事

我完全冇谂过节目组会剪落去
以为𠮶一段冇乜同人互动嘅效果
对于其他人嚟可能比较闷嘅内容未必会剪接出来
估唔到哈

讲嘅时候我都算淡淡然
睇嘅时候我都冇乜感觉
但系当我见到大家嘅DM同埋评论区嘅留言
我忍唔住眼泛泪光
特别系𠮶句： #东京之旅一早比一世遥远
𠮶一下自己好似系全世界面前讲咗一样一路放咗喺心入边嘅嘢
然后有一种被明白、一种释放咗嘅感觉
特别系见到有人DM同我讲谂起自己嘅经历
好明白呢种等待咗另一半好耐嘅感觉
我觉得除咗有人明白
甚至有啲感谢呢啲远方网友嘅安慰

我记得当时我嘅另一半系一位好好先生
大家都会觉得佢好锡我、对我好好
而且佢都系一个冇乜脾气嘅人
所以一路都会觉得呢段关系一定系佢迁就我比较多
𠮶阵时分手
好多人知啲唔知啲在心里面会judge我：咁好，你都分手
好似我有毛病咁
好多出面嘅朋友唔系太熟𠮶啲
知道我分手嘅呢个消息
都send message嚟一人一句、雪上加霜
大家都系识少少扮代表
安慰我嘅人真系得身边了解我嘅三五知己同埋老师

我都冇解释太多
讲多无谓
我忠于自己嘅决定
我亦都知道自己点解要咁样做

我记得当时刚分手的我坐咗喺一间西班牙餐厅入边
面对住我嘅父母
佢哋看似轻松撩我倾偈
然后慢慢由浅入深、步步追问
屋企人问我点解要做呢个决定嘅时候
我睇到佢哋眼神嘅不解同批判

我觉得好难将啲六年半嘅感情逐一诉说
究竟用咩角度讲？
就算用咩角度都对呢件事唔公平
既然分开咗我都唔想影响佢哋对我个EX嘅观感
我亦都觉得有时分开唔系边一个嘅错
我净系知道𠮶六年
我见到身边嘅朋友会同另一半去旅行我都会好羡慕
我都会睇佢哋嘅分享去感受𠮶种喜悦
面对一次又一次，日复日、年复年嘅期望落空
一直好努力、坚强咁去支撑住另外一个人
我知道个一种感受只会我自己最明白
于是当时我收起呢一种无人会明白我感受嘅心情
深呼吸一口气
我最记得我讲咗一句：
总之
我等咗六年嘅日本之旅
我知道自己再等唔到落去啦

讲完我努力将我眼框装满嘅泪水连埋啲食物一齐吞返落去
安安静静咁食埋呢餐饭
佢哋亦因为见到我呢个状态佢哋都冇再问落去

有人问点解唔自己一个去？同朋友去？
咁当然可以咁做啦
但系个重点并唔系去旅行
呢个日本之旅嘅等待系一种象征
系一种我对于浪漫嘅期许同埋我嘅承诺！
总之
下次如果我有男朋友我一定要佢同我去一次日本旅行！
我想畀佢睇我着和服！
我想同佢去环球影城！
我想影好多靓相留低好多回忆！
就系咁！