譚輝智分享好男人定力秘訣：戒亂想 素人速變「吸金王」8個月賺過百萬 丨獨家
發佈時間：07:00 2024-11-12 HKT
今年3月憑《中年好聲音2》而爆紅，40歲的譚輝智（FC）挾住人氣，出道僅2個月已跑出舉行處男演唱會，成為最快開到個唱嘅「中音生」；加埋30多個廣告、商演及為一間旅行社出任旅遊大使，入行不夠半年已速賺過百萬，登上「中音生」的「最快吸金王」寶座！FC現在有名有利，但，他強調唔會色心起，他只會對老婆一條心，還揭示有定力的秘訣。 採訪：方騫平 攝影：羅安強 場地：THE MARKET@ Hotel ICON
最近譚輝智推出處男歌《多麼感激》，歌詞揭對愛妻及歌迷的心聲，多謝太太的陪伴，而他選擇於個唱中首唱新歌時，老婆被感動得爆喊：「諗返起喺比賽期間，將經營嘅美容院交晒畀老婆運作，佢會埋怨我為咗唱歌唔理公司，自己壓力又大到冇得宣洩，有時會講錯1、2句說話，兩公婆就會多咗拗撬，好彩冇隔夜仇。」太太及拉姑都好鍾意這首歌，拉姑更指行啱了路線：「佢話『第一首出嘅歌，喺大時大節、乜場合都啱唱會最着數。』」
家庭事業需要有平衡
FC由素人華麗轉為「人氣王」，工作及收入源源不絕，被指是「中音生」的「最快吸金王」，他既不承認也不否認，用神秘笑住回應：「你幫我計數㗎？我冇計過，唔知道喎！要check下先……不過啲錢會交畀老婆管理，因為我亂使錢，老婆反而會做儲蓄。」FC強調不是放眼賺快錢，反而會着眼做些有意義、對自己有幫助的job，比如做慈善及公益，甚至令自己有進步的好歌，當然都要平衡家庭：「幸而老婆仔女未有詐型。」
直認自己性格有缺陷
提到FC是好老公及好爸爸，跟「中2軟飯偷食王」鄭梓浩相映成趣，雖然現在FC有名有利，但保證唔會出軌：「老婆不知幾放心，佢知我冇呢啲嘢。首先我班fans好斯文，連合照時行近啲都會問下我，其次自己好慢熱，好少同陌生人有交流，做完嘢就走。最重要係好enjoy個家庭，我一直覺得自己性格係有缺陷，好有問題，就算去到20幾歲都唔夠成熟同埋冇承擔，個人又悶兼冇乜自信，一啲吸引力都冇，唔相信會有女仔肯付託終身，邊有人肯同我結婚生仔呀？所以較遲婚，34歲先成家立室，故更加珍惜家庭，尤其太太好正面，乜都肯試，成日喺身邊鼓勵我，畀到我最需要嘅嘢，我哋係最佳組合。」FC還揭示做男人有定力秘訣：「其實只要自己唔諗，對眼自然唔會周圍亂咁望，就唔會造就到出事機會，即使單獨同異性交談都會正正經經，唔會畀到對方有錯覺。」FC坦言有睇過關於鄭梓浩的報道：「我又未有資格教人做個好男人，因為每個人生活模式都唔同，只要唔影響到人，enjoy就得啦。 」
拉姑忍唔住出手買衫
FC變身新一代「師奶殺手」，連謝霆鋒媽媽狄波拉都被迷倒，FC感激說：「佢真係好錫我，我成日問佢點解咁鍾意我？哈！其實連佢都答唔到，只係話『就係因為你，咁嘅性格及樣都夠膽出嚟唱歌，好搞笑。』」他更自爆拉姑經常致電認真地給意見：「佢好似媽媽咁，打嚟只係講兩句，比如『唔好寒背、唱歌冇乜感覺、注意坐姿、服裝唔好，着到個人好矮好怪……』次次都是篤中要害，又真是我的缺點，最近拉姑頂我唔順忍唔住出手買衫畀我，每次約會都有一袋名牌衫。我無以為報，好尷尬呀！唯有回敬返啲小禮物（贊助返佢做美容？）佢唔做㗎。」
