盧宛茵不被尊重掟毛巾洩忿：去死啦 怒呻拍劇被導演玩演員袖手旁觀丨獨家
發佈時間：07:00 2024-04-09
71歲老戲骨盧宛茵(Madam Lo)在TVB劇《隱門》中獲讚連眼眉都有戲，不過，繼被後輩教做戲後，Madam再度不吐不快，怒呻拍劇時被導演不留情面篤住鬧「你睇吓你啲戲？」慘被玩足5日的Madam，最後爆Seed掟毛巾，嚇呆全廠人。受委屈的Madam講返件事仲好嬲，自嘲廢老非常無奈：「𠵱家捧後生，主角又唔鬧得，啲老嘢變咗發洩犧牲品。」滿肚怒火的她坦言唔會向高層曾志偉反映。採訪：方騫平 攝影：鄧國良
TVB「御用媽媽/奶奶」盧宛茵閱歷豐富，後生時省鏡兼略懂日文，力壓其他應徵者成為日資公司文員，之後嫌份工太悶轉投幕前，Madam回望過去：「嗰時大把人追㗎，包括有一間大型日本電影公司高層，哈…如果我唔係入咗TVB，好大機會嫁咗去日本。」
唔明拍劇點解要露股
熱愛演戲的Madam處於半退休心態，跟TVB一年簽一個劇過吓戲癮，唔想咁辛苦，更慨歎遇到好演員、好劇本及好嘅幕後人唔容易，她有感而發：「我唔係彈，但見Facebook彈出啲精華片段，唔明點解拍劇，演員要拍到剝衫露股？可能𠵱家要咁樣嚟吸引觀眾，但我覺得只要劇本好，冇咁嘅必要喎；演員係演戲，無需要剝晒衫去演，做乜要搞成咁？除非係拍三級片，我睇到搲晒頭冇睇落去，要睇呢啲西片大把啦！」問到最想跟TVB哪位小生花旦合作時？Madam大笑一輪後表示未諗到，她最想跟實力派葉德嫻、蘇玉華、羅冠蘭及梁朝偉合作，又想拍許鞍華的深度電影。
陳煒徐榮「食花生」
Madam指𠵱家(做演員) 身不由己好慘，月前拍王心慰監製的新劇《非份之罪》其中一個單元時受咗委屈：「Day 1開始，導演就挑剔及針對我，我忍咗5日。」Madam舉例：「我做做吓戲，佢好不滿咁話『點解個樣冇乜表情？』叫我加啲戲，不斷重覆話『睇你個樣？睇你個樣？』我反問『係咪要大誇？睜眉凸眼嗰種呀？』仲溫提佢，咁樣可能會撞聲(收音)，佢就答唔出話，咁我咪唔睬佢；又試過好大支嘢搵PA召我過去睇Playback，我怕佢乜啫，行埋去就問『點呀？』佢就唔客氣咁話『睇你呀？睇吓你啲戲？』然後對住我個大特寫畫面，做咗個扭隻手手勢，再加句『啲戲唔係咁做㗎嘛！』算！我都係忍。」
Madam呻到停唔到，「最好笑最嬲一次，劇本係寫設局，我被家傭潑水，好讓飾演新抱嘅陳煒有機會甩身走人，咁我就追上去話『你咪走你咪走…』但導演竟然無理取鬧，叫我企定定畀陳煒走，黐線！完全唔合情理，佢根本就冇演戲細胞，我嬲到幾乎爆粗，反問『你想點呀？完全唔啱嘅，係咪企喺度，溫柔叫陳煒你咪走呀？』真係是可忍，孰不可忍，嗰刻谷氣到爆，隨手就執起條毛布掟出去，然後加句『去死啦…』，火遮眼到都冇諗過掟邊個，當時全廠靜晒，氣氛變僵。」她直言在場嘅演員陳煒、徐榮都唔出聲：「個個喺度『食花生』，事後亦當冇事發生，扮唔知及睇唔到，當時只有一位助手好醒目咁上前，搭住我膊頭拉埋我一邊解圍，否則唔知點收科。」最後Madam有拍埋場戲，但返屋企同仔女商量完，決定向監製王心慰投訴：「王心慰第2日馬上入廠安撫我，咁𠱁完咪做埋佢囉，反正得返好少戲份。」
唔敢向曾志偉反映
Madam第一次發脾氣掟嘢，她越諗越嬲：「我做咗半世紀戲畀你咁話？當年導師King Sir(鍾景輝)、梁天都唔會咁話我啦，有時做戲唔使七情上面...拍呢套戲辛苦到我呢，亦提醒咗我日後接戲要睇埋幕後班底。」及後 Madam和朋友分析過，覺得𠵱家公司捧新人，又唔可以向主角陳煒開刀，只能鬧啲老嘢，就係「睇吓你做得幾耐？」問到可會向高層曾志偉反映？Madam卻耍手擰頭：「我點敢搵佢呀。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
