劉嘉玲遇91年《雞鴨戀》幕後興奮傾唔停 孖佘詩曼西貢半日遊食盡馳名小店丨獨家
發佈時間：07:00 2024-03-28
58歲的劉嘉玲好忙，經常陪影帝老公梁朝偉出席全球影展及頒獎禮，Taylor Swift喺新加坡開演唱會又見到佢，又會出席上海的珠寶首飾活動，近月又忙拍攝內地節目《嘉人自友約》，好多網民已從多地野生捕獲Do姐、薛凱琪及羅子溢夫婦等藝人做嘉賓。上周五(22/3)下晝，戴住黑超一身型格Look的劉嘉玲同佘詩曼現身西貢拍節目，食勻馳名小店，前者路過舊墟一間餐廳，跟識於微時的電影幕後相認，嘉玲姐勁興奮，先攬攬再用手機自拍，然後快速想當年，全程笑唔停，普通話夾雜廣東話，更相約有機會再見面。採訪:廖思慧
當日中午12時，劉嘉玲同佘詩曼連拍攝隊伍近30人現身西貢，在舊墟行街時跟一間餐廳老闆相遇，老闆跟她打招呼，傾多兩句就勾起嘉玲姐記憶，原來老闆以前是龍虎武師，嘉玲姐向鏡頭介紹他，還笑笑口上前輕推對方，「他是任達華的專用替身，看一下，像不像任達華。」搞到老闆怕醜大笑。
嘉玲姐笑住傾
老闆提到1991年的電影《雞鴨戀》有份做華哥替身，覺得劉嘉玲唔會記得，女方即大聲跟他說，「《雞鴨戀》?我拍的電影，我怎麼會不記得。」老闆再提1991年拍攝的《子彈出租》，以老人家稱呼華哥，嘉玲姐Feel唔到箇中含義，廣東話回他，「佢嗰時都唔係老人家。」之後再提到方中信有時也會幫襯其餐廳，嘉玲姐好驚訝，「方中信都住在西貢?」嘉玲姐全程答問好多表情，又手郁郁非常可愛，而阿佘及內地男主持就做觀眾，笑住聽兩人吹水。由於趕住拍攝，嘉玲姐要轉場，老闆相約下次有機會再傾。
阿佘超好笑容
夠鐘食Lunch，兩人轉往食車仔麵，店主安排攝製隊坐在店內最入的位置，食客見到身旁有明星光臨都冇太大異樣，又食又拍半小時完成，離開時阿佘面對街坊笑笑口講Hello，街坊大讚《新聞女王》「Man姐」真人原來咁鬼Nice，而嘉玲姐負責埋單，還提店員記得包好外賣。食完正餐個胃仲有少少位，兩人再幫襯同屬西貢名店的馳名菠蘿包，店主安排兩人坐在正門位置，阿佘仲戴住手套食菠蘿油㖭。食飽最啱散吓步，網上有唔少遊客拍到兩人去碼頭睇海鮮，又去行沙灘及捉圍棋，希望節目出街後，可以有助帶旺西貢經濟啦。
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
