孔德賢首演男一暴瘦10公斤決心戒壞習慣感受擔正威力興奮睇賀歲盃被集郵丨獨家

更新時間：07:00 2024-02-23
發佈時間：07:00 2024-02-23

孔德賢（Danny）在《本尊就位》首次擔正，還嘗試多個第1次，令他相當難忘，因被安排在賀年檔播出，曾擔心收視，幸好順利過關，還感受到劇集入屋的威力。另外，拍該劇暴瘦10公斤的Danny唔想累全家，誓要戒掉唔願瞓壞習慣。採訪：杜杜攝影：譚志光

Danny做男一後，新年出街感覺跟以往大不同。

《本尊》在賀歲檔推出，Danny認有壓力，「好驚大家忙於拜年，收視變個位數，咁點交待，好彩收視都唔錯。」他最開心劇集出街後被叫角色名，「我去大球場睇賀歲盃時，好多人嗌我『大仙可唔可以同你影相』，有啲仲係講普通話，好正，有人認得自己，嗌得出角色名，已經好心滿意足。」他相信農曆年前先推出《你好，我的大夫》和《新聞女王》有一定幫助，「3個角色完全唔同，希望將來大家嗌得出我真名，記得我拍過啲乜嘢。」

Danny跟謝東閔在《本尊就位》同樣任主角。

在《新聞女王》演富二代「Cyrus」的 Danny，角色好出位。

Danny在《你好，我的大夫》演患大腸癌慘死的「Edgar」。

自薦巴黎採訪奧運

Danny拍《本尊》初次擔正，對心理和生理都好大挑戰，更因未適應演男一而暴瘦近10公斤，「好恐怖，我得返62.5kg，未試過呢個體重，通常都超過70kg，因為唔夠瞓，又熱到成40度，外景飯盒只食得兩啖，成日好暈好頭痛，體重就跌得好緊要。」Danny去年接受《頭條日報》訪問時，新年願望是戒掉不願瞓壞習慣，1年過去願望未達成的他因拍攝《本尊》，明白保持狀態的重要性，所以希望今年能成功戒甩壞習慣，「如果拍朝早9點都好大鑊，好似通頂去開工，但係人人都好精神，出到嚟唔好就係我嘅責任。」

拍《本尊》時，Danny除暴瘦，還捱到黑眼圈兼雙眼通紅。

Danny到大球場睇賀歲盃，感受到劇集入屋威力。

剛開拍的劇集《反黑2》成功實現Danny去年的另一願望，「演社團小頭目，去另一個字頭做卧底，角色絕對有發揮，所以剪咗呢個頭髮去迎接工作，將會同陳小春、謝天華及小龍（陳國坤）前輩有對手戲，開心又緊張。」另外，他打算自薦去巴黎採訪奧運，「我係運動迷，所有運動都會睇，以往會煲奧運，好想去感受氣氛，最希望親眼見到張家朗攞金牌再訪問佢，仲有見證100米飛人誕生，同埋希望順便去歐洲旅行，哈哈！」