獨家丨裕美不忿林作出事被網民瘋狂恥笑「抵死」 撐男友善良低調幫基層學童補習
更新時間:07:00 2023-09-20
發佈時間:07:00 2023-09-20

上周,裕美貼出溫馨家庭照,開心分享和媽媽赴日尋回生父,一家人失散23年終能重聚,搞喊唔少香港人。不過,裕美話咁快由天堂跌落地獄,男友林作於前日(18日)捲入虛擬資產交易平台「JPEX」無牌風波,以涉嫌「串謀詐騙」被捕。獲讚「最佳女朋友」的裕美24小時stand by隨傳隨到,她不忿網民恥笑林作抵死又指罵男友人格,稱林作做好事唔會宣揚,「唔係攞張支票喺電視現身做慈善就係好人。」裕美坦言經此一役林母都希望林作低調啲,又稱擔心男友:「自己長期冇得瞓。」 採訪:方騫平 攝影:鄧國良

上周一,裕美在林作的半山豪宅受訪,大談返回日本德山鄉下尋父的艱苦經過,表示尋父啟示早於去年底上載社交網,有熱心網友找來其父和田具久的Twitter帳戶,可惜聯絡不上(原來朋友為裕美父開acc後,老父唔識用),之後裕美母親在陳年記事薄內搵到20年前裕美父的手機號碼,由居日朋友代為聯絡上,但裕美父懷疑係騙案,即使跟裕美母女講咗45分鐘電話仍婉拒見面,最後和田具久睇到裕美有關尋父的香港報道,才打破僵局。

一家團聚死而無憾

失散23年終一家團聚,裕美好開心:「見返爸爸同媽媽嘻嘻哈哈相處,彌補返以前唔好嘅回憶,印象中佢哋成日為家庭瑣事發生衝突,我年紀細細去充當和事佬,驚到等父母瞓晒先敢瞓。」另外父母雖然分開多年但並冇離婚,兩老多年來亦冇另一頭家,絕對是大團圓結局:「所以我死而無憾,所有嘢都唔再重要,包括知名度、金錢、婚姻。」她又指同爸爸有血緣關係,一定親過林作。

做人梗會有高有低

對於林作近日再惹官非,裕美表明一定會企佢嗰邊撐到底,患難與共,更有感而發:「每個人都有高高低低,唔會一世都一帆風順,都係一個歷程啫,人生好短暫,冇乜嘢係過唔到嘅!如果身邊朋友,甚至伴侶出咗事而離棄佢,咁樣做人好『狗』。唔好講我,連佢嘅朋友都話『有咩幫手出聲』。」問到點支持林作?裕美都幾擔心,「唉!好多嘢都愛莫能助,最重要我唔會畀壓力佢,唔會問長問短煩佢,當佢有需要幫手,會stand by照顧佢。」

個個鍾意「剝花生」

多口網民笑裕美「搭錯車」,她強調感情事,外人冇資格評論:「以前我勁多男朋友都郁手郁腳打人,佢冇對我郁手、冇對我唔好,兩人之間相處最清楚,有好多人表面紳士到爆,個個都覺得佢好好,但私下係兩回事。」她眼中嘅林作心地善良,只不過係配合social media先表現得譁眾取寵,迎合大眾口味,「最近喺街有家長同我講,話好多謝林作幫佢子女免費補習英文,呢件事佢冇向我『晒命』,連我都唔知,更加唔會對外講啦,呢啲咪好人做嘅嘢,唔係一啲扶完阿婆過馬路再喺網上公開講,攞張支票喺電視現身做慈善。」對於網民鬧爆林作「抵死」,裕美認為𠵱家社會風氣鍾意「剝花生」,唔再care好人好事,更力斥網民恃住匿名,刻薄留言不用負責任。

裕美認為林作只係衰「抽水」,會提他收斂低調啲。
裕美認為林作只係衰「抽水」,會提他收斂低調啲。
裕美指林作對她善良,會低調幫基層學童補習。
裕美指林作對她善良,會低調幫基層學童補習。

經此一役,裕美指林母有提過兒子要低調啲,亦希望裕美多提醒他,「我明白林作,喺佢眼中負面新聞對佢生意有幫助,就算俾人鬧爆,當日做保險生意都做得好好,因為有一班人會明白佢『玩法』,睇吓佢之後嘅路點走,佢有自己諗法,好難改變佢,我只想朋友唔使擔心佢咁多,唔想自己長期冇得瞓。」

去年6月交通意外,林作被控一項不小心駕駛罪。
去年6月交通意外,林作被控一項不小心駕駛罪。
今年6月初,林作抽水荷里活廣場兇殺案事件被狂轟,事發後48小時內知衰,拉埋媽媽一齊道歉。
今年6月初,林作抽水荷里活廣場兇殺案事件被狂轟,事發後48小時內知衰,拉埋媽媽一齊道歉。
7月中,林作視網膜脫落要做緊急手術。
7月中,林作視網膜脫落要做緊急手術。
9月9日炒幣店開幕,裕美跟林作外婆及媽媽王莉妮切燒豬慶祝。
9月9日炒幣店開幕,裕美跟林作外婆及媽媽王莉妮切燒豬慶祝。

《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ