星8卦｜「氣質」感恩「奇人」救命之恩啞忍出軌遲早屈到病

更新時間：11:30 2023-09-08 HKT
發佈時間：11:30 2023-09-08 HKT

其實一直都唔明白，「氣質」點解咁多年都對「奇人」咁忍讓，明白嘅一點係當日「氣質」俾老竇搞，好唔容易逃出生天，「奇人」當時對佢好好，好似救命草咁出現，畀到一個安定「氣質」。「奇人」屋企有個錢，又鬼佬性格，好包容「氣質」啲出位行徑，甚至喺背後畀好多意見，令到「氣質」都得到好多宅男青睞。

「奇人」就成世無乜嘢做，陪住「氣質」出出入入，扮晒藝術家，最慘係逢飲必醉，醉咗就成日亂講嘢，令到「氣質」好尷尬，始終自己有頭有面。「奇人」近日仲離譜，家道中落靠「氣質」養，仲喺出面有幾朵小花搞曖昧，但「氣質」一直當睇唔到，不過就少咗好多二人同行，明顯感情唔多好，而且成日見到「氣質」好落寞咁一個人四圍去。

佢私底下同朋友講自己係個好懶嘅人，既然兩個人都喺埋一齊，就唔可以話分開就分，個男人幾鍾意玩，識路返屋企就唔太計較，而「氣質」脾性咁好，一直都俾「奇人」食住，長此下去，忍只係一個好差嘅鴕鳥政策，趁自己仲有啲籌碼，快啲去搵嗰個啦！