星8卦｜「肌肉」最愛𡁻完唱蝦姐姐娶完老婆幫手還債俾天收

更新時間：11:00 2023-08-29
發佈時間：11:00 2023-08-29

今日見到「肌肉」俾老婆蝦到無地方企，識佢嘅人都覺得心涼。「肌肉」當年恃住有型又大隻，冧到「姐姐」神魂顛倒，可惜兩個人年齡有差距，「肌肉」拍拖到後期，亦借助「姐姐」嘅名氣幫自己上咗位，係時候出去溝吓妹妹仔，「姐姐」好快就知道，無奈同佢分咗手，但最嬲係乜呀？佢竟然喺健身室周圍唱，講到自己好勁，將「姐姐」嘅床上反應同班男人分享。

之後嘅「惡姐」同埋「美女」都係大「肌肉」一截，佢又零舍得呢類有咁上下斤兩，但芳心寂寞嘅女強人歡心，而且個個有錢，都好照顧佢嘅生活，但久而久之𡁻完唱呢個劣行亦喺圈中傳開，大家都對佢敬而遠之，亦無辦法同圈中女人行埋。

「肌肉」後來因為開工識咗志同道合嘅「櫻花」，兩個人一拍即合，「櫻花」完全唔知本土發生乜事，加埋「肌肉」表現溫柔體貼，「櫻花」好快就提出結婚。殊不知「櫻花」老家原來負債纍纍，咁急同「肌肉」結婚就係諗住多個人幫吓手還債，而且一個人又窮又惡，對呢位外地女婿一啲都唔客氣，「肌肉」一世人衰口賤，而家俾人收，真係天地有正氣。