星8卦丨「靚聲」防疫大陣仗全方位保護奇招開工免家人中招

更新時間：10:00 2023-06-02
發佈時間：10:00 2023-06-02

自從通關後，一眾歌手紛紛在不同地方舉行演唱會，搏老命搵番之前錯過咗嘅機會。好似「靚聲」最近去咗隔離埠搵真銀，由於抗疫得力，一家大細連工人都未中過招，所以開工時格外謹慎，同「師弟」唔同嘅係，佢好等錢駛，北上雖然心驚驚，但無人可以抗拒金錢誘惑。「師弟」仲誇張，唔好話北上，連街都唔俾老婆仔女出，但幾小心都終於失守，之後佢好似放監咁周圍去，直情逢請必到。

「靚聲」都好為自己一家人咁努力而自豪㗎，所以無論北上定過大海，出鏡前佢一定着晒全身保護衣，連手襪都戴埋，慌死啲菌沾上身。好似啲食物送到自己手上之前，佢要助手全部消過毒至可以送入房，唯一可以近距離埋身就只得髮型同化粧，但亦都要佢哋着晒保護衣，因為自己梳頭化粧無得着保護衣，咪叫人哋着，以策一萬個安全。

然後每晚同嘉賓影相，「靚聲」都揀過度過，覺得對方成日周街wet嘅就咪埋嚟，通常佢揀啲有錢阿太合照，因為覺得呢班人比較錫身。「靚聲」平時同「大食」好鬼friend，但疫情期間一次面都唔肯見，無非係知道佢同班朋友夜夜笙歌，為咗咁樣「大食」都有微言，話佢顧住啲仔女就唔理朋友。咁又真係情有可原噃，「大食」啲細路大晒梗係無有怕，「靚聲」幾個仲讀緊小學，今次真係難為了爸爸！