薛凱琪驚現巨眼白面嚇窒網民遭貼佛照念經「驅邪」：個樣愈搞愈奇怪

更新時間：17:00 2023-06-04
發佈時間：17:00 2023-06-04

41歲薛凱琪（Fiona）去年憑內地綜藝節目《乘風破浪3》人氣急升，惜近年主力北上發展的她顏值經常成為網民討論焦點，不但屢因疑似P圖過度而被質疑樣子「加工」，更因妝容愈來愈濃而被指與內地時興的「網紅臉」相似。對此薛凱琪一於懶理，繼續「你有你鬧，我有我出Po」，昨日（3日）她則貼出新一輯照片，結果再引起網民批評！

【點擊睇薛凱琪自拍照】：

薛凱琪於帖文以英文寫道：「Darker eyes vs sleepy eyes.（烏黑眼睛VS倦睏眼睛）」相中，綁起一頭曲髮的她面色蒼白，一雙眼大得誇張之餘，仲驚現超大黑眼圈，旋即惹來網民紛紛狠批大走樣：「搞咩？成個師奶貴婦咁，以前嘅清純完全消失」、「驚恐，自然美好得多啦」、「呢個Look唔靚，有啲恐怖」、「本來好哋哋」、「個樣愈搞愈奇怪」等，甚至有人抵死問「何方妖孽」，並在Po下念經及貼佛像照作「驅邪」之用，另有粉絲亦語重心長求她維持原貌：「你本來係好靚好特別，把聲又好聽，唔需要整到同其他網紅咁似，塊面咁尖冇晒辨識度，懷念唱《Better me》時期。」

其實該輯自拍照，是薛凱琪為參加內地歌唱節目《天賜的聲音4》特別化的煙燻妝，她黐上超浮誇假眼睫毛，加上低頭高炒拍攝，才造成「外星人巨眼」效果，事後她亦貼出卸下濃妝的照片，只畫上眼線的薛凱琪終回復昔日靚樣。