獨家丨梁祖堯被Auntie Fans追影笑晒冇詐型行西貢特色市集冒雨聽歌周身郁

更新時間：08:00 2023-05-20
發佈時間：08:00 2023-05-20

梁祖堯好忙，娛樂圈好似乜都關佢事，做舞台劇、節目主持及拍劇，食店開幕見到佢、《大離婚日——妻》公演又見到佢捧場、仲出埋食譜，睇佢IG自我介紹，除咗演員仲係廚師及業餘農夫，身份多到呢。一向知阿祖好支持領養動物，又撐小店，上周六，西貢搞咗個特色市集，以上兩樣嘢有齊之餘仲有歌聽，雖然落住雨，但都見到阿祖留咗好耐，仲冒雨聽年輕樂隊唱歌，全程拍手又拍片，仲被Auntie Fans追影兼集郵。採訪:金泰亨

祖祖坐喺地下冒雨睇Turbulent表演。

上周六，前身為「西貢公立學校」但經過修復後發展成為歷史保育項目的「The Kungers。公立」舉行市集，特設寵物領養、動物按摩工作坊、鳥類教育工作坊及生活市集等，甚至有一線樂隊ToNick表演。

有嘢玩有嘢食仲有嘢學嘅市集，睇吓隻狗狗幾得意。

祖祖好有心
當日前商台DJ麻利都有同星級身心靈修行者夢妮坦開檔，賣零極限縮骨遮兼做慈善解夢塔羅，祖祖同兩人好老友，落住雨都捧場。見祖祖行勻幾個有貓有狗有雀有兔領養的房間，仲逗留好耐，真心想了解更多動物領養資訊。ToNick表演前有5人後生仔Band Turbulent負責暖場，由於一直落住雨，雖然唔算好大，但唔拎遮會濕囉，不過祖祖懶理，笠住外套頂帽就坐埋一邊欣賞，見佢睇得好投入，不時拍手又搖擺自己，聽到主音叫觀眾Follow佢哋IG，有心嘅祖祖即拍片放上IG仲Tag返對方。然後有Auntie走入觀眾堆，一見到祖祖即打招呼，仲行埋一邊拍低祖祖淋住雨聽歌嘅雄姿，雖然被鏡頭對住，但祖祖無話黑面仲做晒表情任Auntie影，最後Auntie更成功雨中集郵，呢張相特別咯。

《星島頭條》新網站有更多精彩內容：http://www.stheadline.com/