林家謙搞笑改獨白冧爆偶像張柏芝
發佈時間：03:00 2025-09-01 HKT
林家謙前晚的第9場紅館演唱會，請來久違香港舞台的張柏芝做嘉賓，引爆全場尖叫！家謙除了「自肥」與柏芝合唱，更即場要求柏芝為他的珍藏CD簽名，兩人又互贈禮物留念，並互相多謝對方為自己圓夢。
對於這晚邀請柏芝做嘉賓，家謙也笑言「好癲」，不禁打自己問「我醒未？」又坦言見到久未現身的柏芝，令他非常興奮。柏芝都自認好緊張，已很久沒唱《任何天氣》，18歲做新人時曾在紅館唱過。家謙即場拿出柏芝的CD索簽名，坦言自己第一個買唱片的歌手正是柏芝，並自爆：「《不一樣的我》係我當年成日拎嚟做參賽歌曲㗎，嗰陣我還未轉聲，唱你個Key，霎眼間我就已經轉咗聲，好神奇呀呢件事！」
柏芝透露收到邀請時，擔心自己為人熟識的歌並不多，「我紅得一首歌……」家謙卻細數《一直掛念》、《不一樣的我》、《棉胎》等幾首經典歌，笑指柏芝的講法不成立。而柏芝得知有機會再上紅館舞台，特別要求唱《留給最愛的說話》，她坦言：「我希望每一分每一秒都珍惜身邊所有的東西，很多東西都不是必然，我們應該要很活在當下和開心，珍惜所有自己愛的人，我選擇呢首歌，亦係很感恩地可以在紅館和大家一起唱。」家謙則將《留》的獨白改為：「終於我鼓起咗最大嘅勇氣請你做嘉賓，因為我想面對住你講出我心裏面想講咗好耐嘅說話。可惜嗰個落雨嘅晚上，嗰條濕滑嘅公路，嗰個粗心大意嘅司機，令我差啲趕唔到嚟紅館，講一聲：多謝你。」引來觀眾笑聲不絕。
柏芝自爆緊張到聲都震
至於在演唱會「360吊車」環節，家謙突然在社交網開直播，與未能到場的歌迷同樂，有來自英國、加拿大等不同地方的粉絲驚喜同步看到家謙的紅館演出。完騷後，柏芝在社交網分享感受，笑指自己在台上緊張到聲都震，並感謝家謙讓她有機會在紅館唱歌，昨日她繼續發文分享家謙送贈的演唱會周邊禮物，包括倫敦演唱會唱片、香水、蠟燭等，家謙更在唱片封套寫上「多謝你圓了我的夢，多謝你美麗的回憶」等字句，而柏芝也多謝家謙圓了她的夢。此外，家謙亦在社交網留言「天氣之子多謝天氣之女」，並分享柏芝在演唱會海報上寫給他的加油打氣字句。
