Brooklyn寧去睇騷 唔陪碧咸嫂慶生
發佈時間：03:00 2025-04-20 HKT
4月17日正是「碧咸嫂」Victoria Beckham的51歲生日，她日前就在IG大晒與家人慶祝生日的照片，但大仔Brooklyn和新抱妮歌娜佩絲（Nicola Peltz）再度缺席，令Brooklyn與家人關係惡化的傳言越傳越勁。
碧咸嫂生日當天與老公碧咸（David Beckham）、二仔Romeo及細女Harper齊齊遊船河，夜晚又聯同朋友開派對慶祝，及後更上傳圖片到社交網。然而圖輯中可見，Brooklyn和妮歌娜，以及三仔Cruz都未見蹤影。據指Cruz及後在社交平台分享了女友Jackie Apostel的貼文，暗示小倆口遲些會為碧咸嫂補祝生日。而Brooklyn不但未有如往年般發文祝賀媽咪，還跟老婆齊齊上傳於Coachella音樂節狂歡的照片。直至傳媒報道他寧願去沙漠睇音樂節，都不願陪老媽慶生，Brooklyn才秒刪該段貼文。
向細佬下通牒：有她無我
其實Brooklyn與家人關係生變已早見端倪，碧咸嫂的時裝品牌上月在巴黎舉行時裝騷時，Brooklyn夫婦未有撐場。上月底英國母親節期間，Brooklyn亦未有發文向媽咪致敬。月初碧咸大搞派對預祝50歲生日，Brooklyn又係無影。之前有傳他缺席家庭聚會是因為與細佬Romeo反目，有指Romeo正與大佬舊愛Kim Turnbull拍拖，Brooklyn見Kim兜搭完自己，多年後又來勾搭細佬，質疑對方貪圖碧咸家名氣，更對細佬講明「有她無我」，兩兄弟因此變得不咬弦。不過最近三弟Cruz就澄清，指大哥從未與Kim拍拖。
據《每日郵報》報道，由於今年乃碧咸50大壽，待下月2日他生日正日就會再舉行盛大慶祝派對。消息人士指Brooklyn和妮歌娜已答應到時會出席。但觀乎Brooklyn現時與家人關係惡化，不知屆時他倆會否應約出席。若然他們繼續玩失蹤，出名錫仔女的碧咸肯定會勁傷心。
