KellyChu - 復刻小籠包紅燒獅子頭滬式蔥油雞大家樂聯上海姥姥推首個滬菜軟餐 | Executive日記

KellyChu

2小時前

內容

隨着香港步入高齡化社會，近年唔少餐飲企業都推出容易咀嚼嘅軟餐產品，為有需要長者重拾用餐樂趣。大家樂集團旗下輕嚥料理品牌「食得樂」及休閒餐飲品牌「上海姥姥」聯手合作，推出全港首個上海菜系照護食「軟滬餐」，涵蓋小籠包、滬式蔥油雞、鎮江黑醋骨、紅燒獅子頭等經典滬菜，更有「姥姥軟滬餐寶盒」一次集齊6款美味。產品即日起於8間上海姥姥分店供應，實現真正「同桌共膳」嘅溫暖滋味。

　　這份「軟滬餐」菜單並唔簡單，團隊為符合照護食標準指引及國際吞嚥障礙飲食標準（IDDSI），同時保留經典上海菜嘅色、香、味，耗時多月反覆研發。例如經典滬菜小籠包，團隊便用咗差唔多兩個月時間先成功「復刻」。大家樂集團休閒餐飲總經理鄧蕙翹話，「小籠包外皮煙韌、內裏多汁，對吞嚥困難者其實係高風險食物。我們透過特殊塑形技術，還原其形狀與風味，讓它變得安全又美味。」

　　照護食既能減輕照顧者嘅壓力，又可令吞嚥困難者重拾用餐嘅樂趣。言語治療師譚家恩解釋，吞嚥困難者往往會因飲食限制而食欲不振，甚至擔心食飯過程中出現咳或者嗆而拒絕與家人同枱食飯，種種因素都影響到佢哋嘅社交與生活品質。而「軟滬餐」嘅出現，正正回應咗吞嚥困難者嘅心聲。

　　集團同時宣布上海姥姥成為社聯「照護食」計劃之種子餐廳，為咀嚼及吞嚥困難人士開拓更多元化飲食選擇。

KellyChu