KellyChu - 4座LABUBU及ZIMOMO離境層伴你出遊 7米高巨型KING MON登陸機場 | Executive日記
KellyChu
2小時前
字體大小
7米高KING MON裝置屹立在香港國際機場，萬眾矚目。由香港藝術家龍家昇設計嘅LABUBU，全球大受歡迎，佢係龍家昇以北歐神話為靈感創作嘅「THE MONSTERS」系列其中一個角色，當中另一個角色KING MON更解作「king of the monsters」（精靈之王）。適逢THE MONSTERS系列誕生10周年，龍家昇為香港國際機場設計咗全球最巨型嘅KING MON裝置，高7米，黑色大精靈身穿HKG字樣白T恤，手持紙飛機同行李箱，就像陪伴大家出遊，令旅程添上一抹童趣。
「THE MONSTERS × 香港國際機場」藝術體驗昨天正式揭幕，除咗離境大堂嘅巨型KING MON裝置等市民和旅客打卡，仲有4座1.5米高嘅LABUBU及ZIMOMO角色裝置，亦喺離境層禁區範圍可愛登場，佢哋均配搭旅行主題配件，包括購物袋、行李箱及度假服飾等，其中兩座更配上以龍家昇手繪作品為藍本設計嘅打卡牆。
龍家昇喜歡透過繪本說故事，透過不同精靈表達自己嘅感受，以及人性不同嘅面向。佢話，自己好多年前已經好想畫精靈作品，終於喺2015年成事，之後亦做咗好多相關活動和展覽，多謝大家一路支持，令THE MONSTERS系列可以走過10年，佢非常開心，之後佢同精靈會衝出香港，喺其他地方以不同造型展示，同國際粉絲見面。
香港國際機場同時會於9月25日至10月15日期間，送出機場限量版18厘米LABUBU手辦，手辦以香港國際機場標誌性色彩設計，手持印有「HKG to Monster Land」嘅登機證，具收藏與紀念價值。其中活動更包括THE MONSTERS貼紙及其他豐富獎賞，為旅客帶來一場充滿奇趣嘅藝術體驗。
KellyChu
香港國際機場將於9月25日至10月15日期間送出機場限量版LABUBU手辦。
適逢THE MONSTERS系列誕生10周年，龍家昇設計香港國際機場限定版KING MON巨型裝置。
最Hit
