KellyChu - 「如心園」添浪漫聲光匯演任打卡 | Executive日記
KellyChu
2024-09-16 02:00
字體大小
喺去年年底開放給公眾嘅「如心園」，係香港獨一無二嘅新景點，園內展示一系列彌足珍貴嘅木化石藏品，為市民同遊客展開一趟跨越數百萬年嘅溯古旅程。近期園方喺晚上加推戶外「聲光匯演」節目，光彩耀目，畀訪客難忘嘅體驗，Kelly就不斷打卡，傳畀朋友睇，佢哋仲以為小妹去咗外地旅遊𠻹。
展木化石藏品可觸摸
毗鄰荃灣如心酒店嘅「如心園」，園區同設施佔地約7萬平方英尺，展有千百年歷史嘅化石，訪客可以任意觸摸同欣賞這些珍品。小妹朋友話，佢觸摸化石期間，感受到一陣陣能量傳遍身體，嘩，咁神奇！
最近好多人相約去「如心園」，原來晚上加推「聲光匯演」節目，每日晚上7時開始，喺鐘心廣場放映5次，每半小時1次，長約4分鐘嘅立體光影show，融合視覺、音樂、燈光同煙霧效果，喺星空下營造愉悅嘅浪漫感覺，為「如心園」之旅劃上圓滿嘅句號。
「如心園」朋友話，聲光匯演節目會定時更換，現在正放映嘅節目名為「光陰交響曲」，係一場充滿詩意嘅燈光秀，故事從象徵永恆嘅廣闊天空開始，通向生命嘅搖籃—地球……大家去親身體驗吓，照相留念，一定好似小妹咁，覺得好難忘。
KellyChu
更多文章
