《明星副易袋》EP.3｜劉威煌 珍珠奶茶老闆
星島 New Media 記者
2022-01-21 11:50 HKT
字體大小
《明星副易袋》第三集，今集嘉賓係劉威煌，講個小秘密俾大家聽，其實我同威煌細個係歌唱比賽認識，以前佢已經係各大區際比賽嘅常客，更加攞過不少獎項！
講返正題，今次約威煌做訪問，主要傾下佢做生意嘅心得，了解一下佢珍珠奶茶生意嘅心路歷程。原來佢自小就好鍾意搞生意，做過手機貼膜（想當年好流行），又開過音樂室、密室逃脫，佢話樣樣都有錢賺。直至2016年，佢唔再續約TVB，同朋友夾份開珍珠奶茶店，短短3個月就達到月賺80萬，可想而知佢幾有生意頭腦。到17年佢就同柏檔去咗台灣傾品牌代理，最後成功傾咗珍煮丹嘅香港總代理，更留咗喺台灣打工3個月，學習對方整套系統。
雖然同威煌認識一段時間，但今次先真正同佢傾下計，發現威煌係想法好成熟，好知道自己嘅路點行，訪問中佢講咗一句令我有啟發：「呢刻我唔需要音樂為我帶來幾多，而係我可以玩音樂玩到幾多。」威煌同我都係自細就好喜歡音樂，亦係透過音樂比賽入行，亦都係夾Band，亦都係有份工作邊玩音樂。佢話以前只有唱歌時，會因為錢而選擇性唱，多啲錢嘅就接，少錢就唔接，宜家就個個星期開Live唱歌，為嘅就係快樂。威煌「揾食」解決到，音樂方面就能隨心所欲，上年開完演唱會，成績不俗，今年預計再開演唱會！！
唔係每一位歌手嘅發展都係順風順水，路唔止一條，守經達權，堅守自己嘅初衷，能夠靈活變通，最後都能夠成功。
重温：
明星副易袋｜TVB月薪7千難捱 林秀怡開餐廳疫情蝕錢唔炒員工
