KellyChu - 啟德爆場創紀錄大讚球迷「好氣」羅淑佩捧港足拉隊消夜撐夜經濟 | Executive日記

KellyChu

3小時前

內容

港隊周二坐鎮啟德體育園主場館，於亞洲盃外圍賽中以1︰1賽和孟加拉。文體旅局局長羅淑佩亦再次到場觀戰並為港隊打氣，完賽後聯同文體旅局副局長劉震、體育專員蔡健斌等人，往九龍城一間魚蛋粉店食消夜醫肚，支持地區經濟。羅淑佩感謝球迷全程無間斷打氣，話大家真係好犀利，「我都聲沙，點解佢哋可以嗌足幾個鐘咁好氣？」可見球迷熱情如火！

　　羅淑佩賽後接受記者訪問，對於港隊最終賽和孟加拉，佢感歎「當然贏是最好」，但下半場港隊「打少個」，認為賽果可以接受；亦好開心見到港隊球員非常落力，指有如此龐大嘅球迷支持，以及咁好嘅場地和球員，對港隊出線有信心。佢又話，比賽時好擔心守門員謝家榮會受傷，事後向足總查問知道對方應該無大礙，亦鬆了一口氣。

　　羅淑佩稱，今場賽事入場人數再創新紀錄係「意料之內」，形容球迷「一票難求」，而且體育園亦帶旺到地區經濟，「除咗賣紀念品和球衣嘅店舖，也有不少食肆受惠」，會繼續舉辦多些活動帶動啟德主場經濟。

　　被問到兩隊都有球員喺賽事期間「跣腳」，羅淑佩表示自己都有留意到，賽後亦有就草地問題徵詢港隊隊長葉鴻輝意見，對方指出草地平整上有空間改善，佢都會請啟德體育園研究，盡量提升草地質素。

KellyChu