KellyChu - 「搞手」獨力籌辦象山邨燈籠陣 為愛妻打造十年「屋邨浪漫」 | Executive日記
KellyChu
5小時前
字體大小
剛過去的中秋佳節，象山邨天井掛滿燈籠，變成溫馨燈海，成為城市裏的繽紛風景，吸引市民到來打卡。Kelly一邊賞月一邊遊象山邨，發現背後有一個窩心故事。由自製數百個燈籠到拉線掛起，「搞手」鍾先生十年來憑藉一人之力籌辦象山邨燈籠陣，只為博老婆歡心，營造獨特嘅「屋邨浪漫」。
多年前一個中秋夜，鍾先生因太太一句︰「人哋啲燈籠好靚」，便許下承諾，下一年為她做一個大型燈籠陣。為此，鍾先生自行設計燈籠陣形，兼喺中秋節前夕為400個燈籠入電裝燈。佢笑言自己「冇藝術細胞」，但每年都花心思設計新圖案，希望從天井望上去時能呈現不同的形狀。
一連幾年「搞得成」燈籠陣，鍾先生指關鍵在於建立信任，「第一次做嘅時候，我貼咗張紙，上面有我個名、單位、電話。有事可以即刻搵到我。掛完燈籠未拆之前，我都唔會離開屋邨。」久而久之，管理處願意通融並配合。
佢坦言，多年來全靠街坊包容與保安幫忙，令屬於象山邨嘅節日傳統能延續至今。佢指，中秋兩日大堂人流太多，偶有住戶投訴，幸得保安協助安撫，亦有街坊主動鼓勵他。鍾先生也提到，樓下女保安明年退休，「佢好好人，成日幫我解釋畀街坊聽我做緊乜。希望佢退休前，呢個小搞作可以繼續搞得成。」
象山邨屬於雙塔式設計，中央天井寬闊，係懸掛燈籠的理想場地。八、九十年代時，公屋燈籠陣盛行，如今此情此景重現，令不少市民感到親切懷念，每年中秋更有大批市民到場「打卡」。
燈籠陣昨日拆卸，但Kelly相信，呢份屬於象山邨嘅人情味會永遠留在心中。
KellyChu
鍾先生掛起燈籠。
