Cally - 房委會「共築創業家 2.0」信和集團全力支持 | 商界講呢啲

Cally

2025-09-02 02:00 HKT

內容

　　信和集團支持嘅房委會「共築創業家 2.0」計劃，為後生仔創業者提供免底租同埋彈性分成模式嘅實體店舖，首階段成效理想。8月份喺奧海城、藍灣廣場同荃新天地已經開咗4間鋪。而家第二期申請開始接受，包括屯門市廣場、奧海城、荃新天地等多個地點，一樣係頭6個月免底租加彈性分成，等創業者可以宣傳自己嘅品牌理念，擴展業務。

　　房屋局局長何永賢亦親自去到奧海城支持，仲同啲創業家一齊整手工香品、環保捲紙工藝同沙畫。佢讚後生創業家將藝術、環保同健康元素融入創業理念，展現多元創意。信和集團會根據唔同品牌嘅概念幫佢哋揀適合嘅地點，仲提供全面嘅市場推廣支援。信和集團資產管理董事蔡碧林話：「成功入選嘅品牌都有環保升級再造、可持續發展同埋身心健康嘅元素，呢啲都係配合而家大眾追求綠色生活嘅趨勢，亦同我哋着重嘅社區發展理念非常匹配，值得支持。」