【阿碌開咪】點解授勳佢哋冇份？
《名家合集》收錄名人文章，分享觀點，探討時事。
2020-10-03 08:31 HKT
字體大小
特區政府公布二○二○年授勳名單，向六百八十七人頒發勳章或嘉許狀，歷年最多。
其實呢類「分餅仔」冇數量限制，派多啲，根本冇所謂。政治八卦江湖，最多人留意，唔係邊個攞到，而係邊個「攞唔到」！因內裏可能大有文章，意義深遠。
眾所周知，呢張名單一定要經特首扑槌，然後再得到中聯辦（加港澳辦？）祝福，才可出籠。所以，邊個冇分，圈內人人關注。
今次警隊中人「得獎」倍增，相當「政治正確」，因要向社會發出非常明確的訊息，大家心照。
一般市民關注點則在：「點解過去大半年，最出色的公務員及模範發言人，深得民心的張竹君，竟然冇分？係咪因為有人覺得佢『太出色』，影低晒其他人呢？另外，袁國勇、許樹昌等防疫專家，也是冇得被表揚。以上三位，在疫情之戰中，乃市民心目中的英雄人物喎！」
唔知林鄭下周二行政會議前，會否有令人信服的答案呢？
就今次授勳名單，小弟拉來官場高人「大S」，問佢點睇，有乜市民唔留意，但官場人覺得非常重要的「訊號」？
「阿碌，政府授勳，一向有種不成文規矩或模式。第一，為政府公職捱過主席位的，一律會有不同級數勳章。另外，無論因乜原因，退休或離職的高官，亦會有勳章。呢類安慰獎，對政府形象及對當事人心理，皆有好處。反正，唉……講真，個勳章到如今，仲有乜代表性吖？」
「大S」指今次名單中，有幾位是「離奇地」未有「獎」的，內裏必大有文章。第一個是多年來仆心仆命，為房屋及土地問題付出龐大努力心力的黃遠輝，佢在出任土地供應專責小組主席時的貢獻，尤其重要！
另外，四位中途被「請離」的前局長，只得劉怡翔獲「荷蘭水蓋」，其他劉江華、羅智光、楊偉雄，全部「安慰獎」都唔畀，即唔畀面！究竟幾位在任時，發生過乜事，令特首或中聯辦要「勾腳」呢？故事肯定非常吸引！
曾智華
阿碌開咪
（左起）黃遠輝、楊偉雄、羅智光。
最Hit
更多文章
