Executive日記——郭秀雲養豹貓屋企動物要搬竇

專欄

更新時間：04:25 2015-06-19
發佈時間：00:00 2011-12-07

       「鋼鐵大王」龐鼎元新袍、曾是當紅艷星的郭秀雲（Sharon），外形弱質纖纖，但Kelly告訴大家，唔好俾佢呃到，因為Sharon有一顆野性的心，她獨愛飼養大隻男都怕怕的奇珍異獸，好似變色龍、蝎子等。要數Sharon近年新猷，算是豹、貓混種得來的豹貓喇，呢隻豹貓性情兇猛，身形比一般家貓大兩、三倍，愛食血淋淋生肉，Sharon為咗養佢，其他動物被迫遷居，可謂「生人勿近」喇。
      Sharon出名酷愛動物同大自然，經常跟一眾城中名媛羅寶文、傅明憲等孖住出席function，宣揚愛護動物訊息。中德混血兒嘅佢，唔知係咪鬼妹仔性格，覺得人無我有先至夠型，所以專吼一啲冷門動物，連行行吓超市都可以收養一隻藍色龍蝦返屋企，研究一番，真係愛心爆棚。
      諗住養蛇老公怕怕
      其實Sharon德國籍的父親，曾經在海洋公園擔任專家，幫手搜羅世界各地奇珍異獸，相信對Sharon有好大啟發，仲培養出過人膽識，好似普通港女聽到都面露難色的大百足、蚯蚓咁，Sharon都輕鬆把手玩弄，細心研究吓牠們的毒汁由哪處釋放出來。
      Sharon又曾經養過變色龍、蝎子，龍吐珠等，搞到屋企成個動物園咁，相信唔係人人敢入去喇。下次佢仲話想挑戰養蛇，但老公怕怕，唯有等吓先啦。
      Kelly Chu


■Sharon最愛冷門稀有動物，近年更養埋出名「難養」的豹貓。