KellyChu - 最新一期《守護同行》出爐化學博士投身消防隊長以專業知識護社區 | Executive日記

專欄

更新時間：02:00 2025-06-11 HKT
發佈時間：02:00 2025-06-11 HKT

想知道更多消防處嘅工作，不妨可以留意佢哋嘅刊物《守護同行》，例如最新一期就訪問咗兩名擁有博士資歷嘅高級消防隊長，佢哋分享自己從學者轉職為消防人員嘅契機，並如何在工作中運用專業知識協助處理危險事故。

　　高級消防隊長譚子健及李聖淘，均擁有化學系哲學博士資歷，佢哋本身從事學術研究工作，後來分別選擇加入消防處。譚子健從美國學成歸來後，重拾年輕時希望加入紀律部隊嘅願望，決定進行矯視手術並投考消防隊長。李聖淘轉職嘅契機則源自一次交通意外，佢指當時看見前車失控撞壆，立即將被困司機救出，司機向佢投以感激眼神，令佢萌生希望幫助更多人嘅想法。

　　二人克服體能要求及調節自己適應團隊合作，先後成功投考見習消防隊長。李聖淘分享曾處理一宗實驗室洩漏化學品事故，當時現場散發嘅獨特氣味令佢懷疑係丙酮，經調查後迅速確認，及時制訂合適應對措施。譚子健和李聖淘都認為消防嘅工作範疇多元，高學歷人士亦可於不同崗位應用專業知識和技能，勉勵有志服務社會人士轉職投考消防絕對「有心唔怕遲」。

　　新一期《守護同行》還提及特區搜救隊3月趕赴緬甸協助地震救援工作嘅經歷，以及成立「新建消防設施一站式驗收統籌辦公室」和「分區公眾安全隊」提升社區消防安全等工作。欲了解更多精彩內容，即刻掃描二維碼瀏覽電子版喇。
KellyChu