許冠文獲頒榮譽博士籲香港電影人「煮新菜式」
發佈時間：03:00 2025-06-04 HKT
被封為「一代笑匠」的82歲許冠文，昨日在香港恒生大學「第五屆榮譽博士學位頒授典禮」上獲頒授榮譽社會科學博士，以表揚他在演藝界卓越成就。而許冠文的太太及兒子齊齊到場，見證他獲頒授榮譽時刻，不過兒子就婉拒拍照。
典禮現場莫家豪教授宣讀讚辭時提及「Hello文」角色名字時，即引來全場歡呼聲。許冠文表示最近聽到好多人叫他做「Hello文」，電影《破．地獄》好有意思，以前自己演出電影被人覺得好笑，今次雖則乞人憎，但提醒大家對上一代及爸爸懷念，發現大家都變得孝順。講到演藝之路，許冠文表示當初讀社會學時，未想過會對做導演有幫助、拍出好地道同大眾化的作品，但這些是讀書時潛移默化，而電影能影響到一個人的性格及人生希望，好似15、16、17歲時睇了幾部電影，就跟住電影英雄走，亦影響到自己價值觀，他說：「《七俠蕩寇誌》同影星尤百連納，呢啲英雄片同英雄影響了我一生！」
「人生好似三文魚」
此外，許冠文表示非常高興孫仔、孫女也有到場，他們明年讀大學，6、7年後都可能獲得博士學位。當再追問孫仔孫女對電影可有興趣？他笑言沒有，但人生好似三文魚，最終都會做自己的事，又表示自己入行亦是當時讀大學無錢交學費，才會加入TVB工作，接觸後發現電影、電視也能影響世界，若然生命可再行一次，一定會修讀電影、副修社會學，又認為近年《破．地獄》、《九龍城寨之圍城》有好多新演員及導演都是正統畢業，所以想法會做得更深入，亦覺得香港電影有希望。
問到覺得人生最燦爛是哪一個時刻？他說：「𠵱家囉！因為𠵱家睇通咗一啲嘢，一生都追求人生意義，但究竟人生意義係乜呢？最終都要面對死亡。所以覺得《破．地獄》兩位編劇好厲害，答咗我問題，人生意義唔重要，最重要欣賞沿途風景同珍惜身邊陪伴嘅人，但加埋唔夠10個、8個，如果遠大啲，連敵人都欣賞埋，難得一齊就原諒佢。呢個係我拍《破．地獄》嘅收穫，如果我做編劇同導演都會跟呢個方向走。」提到黃子華與鄭秀文合作新戲，他表示不清楚，聽聞是愛情題材。至於可有說話鼓勵現今香港電影從業員？許冠文說：「雖然好多戲院關咗門，張枱靚無用嘅，都要啲嘢好食，票房先會好！但要諗點樣煮，𠵱家一定要諗啲新嘢，未見過、未睇過、未聽見過嘅，同埋要夠膽、要博！」
