裕美不滿被捲 「無緣新抱」風波：好火滾
發佈時間：03:00 2025-06-03 HKT
近日林作母親王莉妮（Lily）在社交平台公開「無緣新抱」麥明詩（Louisa）兒子的正面照，引發洩密風波，不僅遭網民狂轟，更惹怒麥明詩本人，要求刪除照片。事件亦波及林作現任女友裕美，她接受《星島頭條》獨家訪問時直言：「成件事好戇居，加埋目的好奇怪，涉及嘅身份又『騎呢』！」更不滿表示：「我呢行咁耐，唔鍾意啲人借人上位，見到就火滾！」 直指麥明詩係風波中始作俑者。
「十優港姐」麥明詩與機師老公盛勁為去年5月奉子成婚，今年3月生B，但Louisa一直玩神秘未有公開BB性別，直至最近林作媽媽王莉妮探望「無緣份的新抱」及「哎呀孫」時在社交平台一口氣貼上多張冇打格仔BB正面相說：「雖然阿詩與林作無緣，但我一直當她是自己的女兒，現在阿詩有咗兒子，就似我有咗孫一樣，真心為她高興。」林作媽媽更送上一封大利是給麥明詩兒子，3人溫馨合照，不過，發文後一小時，Lily突然刪PO。
林作現任女友裕美忍不住向《星島頭條》還原事件真相，公開係有人設局讓有分享症的Lily姐墮網：「據我了解其實係前度意思，佢係咁微信Lily姐，煩咗人哋咁耐，猛咁游說Lily姐上契，做佢兒子個契媽，最初Lily姐睇完訊息都唔知點應對好，佢跟我同林作食飯時，曾展示有關訊息畀我哋睇，仲同林作講『唔知點推好！』其實同乜人做朋友係有自由，我哋冇意見，直到佢前度真係坐言起行話帶埋兒子出嚟，Lily姐推無可推。」點知見面後就出咗事，結果Lily姐一時興奮更不懂打格，將BB正面照上傳社交平台，事後才驚覺不妥，急忙刪文，還緊張向林作求救。
維護作媽被利用非炒作
裕美直言麥明詩的做法令人費解：「作為前度，搵前度阿媽上契，呢件事本身就有問題，有病嘅人先會諗到咁嘅嘢！」她認為Lily姐只是出於禮貌，不懂拒絕，不知處境尷尬，亦沒想到會衍生更多麻煩，被外界誤解為「恨抱孫」、「好鍾意前度」，間接否定林作現有的感情關係：「件事發生後，好多人傳訊息我，話我不受尊重，我真係有啲忟憎！」
一向愛「抽水」的林作，今次竟一反常態，僅回應「冇意見」。裕美無奈表示：「我同Lily姐又冇血緣關係，嚴格嚟講關我咩事呀？但咁樣做好唔尊重自己個仔，尊重人係基本禮貌！大家好嚟好去，喺角色上係咪有啲不被尊重嘅感覺呢？我認為做任何嘢之前要諗一諗有冇影響到其他人囉！」她強調自己只想專注工作，不想捲入是非，但事件已對她造成困擾。
事件曝光後，網民紛紛留言批評Lily姐「恨抱孫恨到流口水」，甚至牽連林作，指「有其子必有其母」。裕美則為Lily姐辯護，指她只是被動回應，並非主動炒作：「Lily姐意願根本唔係咁，老人家純粹好客氣，唔識諗到咁多後果。」 裕美最後補充：「成件事加埋目的都好奇怪，涉及身份又『騎呢』，一個人前度搵你，仲話將個仔上契，係佢做主導，點知搞到畀人誤會係Lily姐意願，好心唔好搞到諗嘢正常嘅人啦，連林作都同我講『成件事好戇居，佢阿媽鍾意點就點，唔好煩到佢。』」無辜被貶的裕美耿耿於懷說：「我所講係事實，有乜講乜，我冇怪責Lily姐，純粹係對事不對人，我呢行咁耐唔鍾意啲人借人上位，見到就火滾，但娛樂圈就係咁。」她表示不想再參與這場風波，自己也是無辜受害者。
